Monday, September 22, 2008

கொண்டைக்கடலை குருமா

தேவையானவை

கொண்டைக்கடலை - 1 கப்
உருளைக்கிழங்கு - 1 (optional) (நறுக்கியது)
வெங்காயம் - 1 (நறுக்கியது)
தக்காளி - 1/2 (நறுக்கியது)
பச்சை மிளகாய் - 1
கறிவேப்பிலை - சிறிது
மிளகாய்த்தூள் - தேவையான அளவு
உப்பு
எண்ணெய்

வறுத்து பொடிக்க:

கொத்தமல்லி - 1 டீஸ்பூன்
சீரகம் - 1/2 டீஸ்பூன்
பட்டை - 4 அல்லது 5 சிறிய துண்டுகள்
கிராம்பு - 2
பாதாம் - 4
முந்திரி - 10

எண்ணெய் விடாமல் வறுத்து பொடிக்கவும்.

செய்முறை

  • கொண்டைக்கடலையை 8 மணி நேரம் ஊற வைத்து, குக்கரில் வைத்து 3 விசில் விட்டு எடுக்கவும்.

  • கடாயில் எண்ணெய் விட்டு வெங்காயம், பச்சை மிளகாய், கறிவேப்பிலை சேர்த்து, நன்கு வதங்கியதும், உருளைக்கிழங்கு, தக்காளி சேர்த்து வதக்கவும்.

  • சிறிது தண்ணீர் விட்டு உருளைகிழங்கை வேக விடவும்.

  • பிறகு கொண்டைக்கடலை சேர்த்து, அரைத்த பொடி , மிளகாய்த்தூள், மற்றும் உப்பு சேர்த்து நன்கு கொதிக்க விடவும்.


  • மல்லித்தளை சேர்த்து எடுத்து வைக்கவும்.




பூரி, சப்பாத்தி அல்லது தோசையுடன் சப்பிடலாம்.

Saturday, September 6, 2008

காரக்கொழுக்கட்டை

தேவையானவை


அரிசி - 2 கப்
வெங்காயம் - 1 ( பொடியாக நறுக்கியது)
பச்சை மிளகாய் - 5-6 ( பொடியாக நறுக்கியது)
கேரட் - 1 (துறுவியது) (optional)
தேங்காய் - 2 டேபிள்ஸ்பூன் (optional)
உப்பு
கறிவேப்பிலை
கடுகு
சீரகம்
எண்ணெய்



செய்முறை

  • அரிசியை 4 மணி நேரம் ஊறவைத்து உப்பு சேர்த்து கொறகொறப்பாக அரைத்து எடுக்கவும்.


  • கடாயில் எண்ணெய் விட்டு கடுகு, சீரகம் தாளித்து வெங்காயம், மிளகாய் , கறிவேப்பிலை சேர்த்து நன்கு வதக்கவும்.


  • அதில் கேரட் மற்றும் தேங்காய் சேர்த்து வதக்கவும்.


  • பிறகு அரைத்த மாவை சேர்த்து, கையில் பிடிக்கும் பதம் வரும் வரையில் நன்கு கிளறவும்.


  • மாவு நன்கு ஆறிய பிறகு, கொழுக்கட்டையாக பிடித்து இட்லி தட்டில் வைத்து வேக விடவும்.



தேங்காய் சட்னி அல்லது ஊறுகாய் இதற்கு நல்ல மேட்ச்

Thursday, September 4, 2008

விநாயகர் சதுர்த்தியும் விடை தெரியாத கேள்வியும்



நேத்து விநாயகர் சதுர்த்திக்கு கொழுக்கட்டை, சுண்டல் செஞ்சு சாமி கும்பிடப்போறப்போ என் பையன் ( 4 1/2 வயசு) கேட்டது.


பிரணவ் - அம்மா காலையிலேயே நான் குரு பிரம்மா எல்லாம் சொல்லி சாமி கும்பிட்டாச்சே. இப்ப என்ன special


நான் - இன்னிக்கு விநாயகர் சதுர்த்தி.


பிரணவ் -அப்படீன்னா என்ன?


நான் - வினாயகருக்கு இன்னிக்கு birthday


பிரணவ் -அப்ப கேக் கட் பண்ண போறோமா?


நான் - உனக்கு கேக் பிடிக்கிற மாதிரி விநாயகருக்கு கொழுக்கட்டை பிடிக்கும். அதனால கேக் கிடையாது.


happy birthday vinayakar பாடி முடிச்சாச்சு. அப்புறம்


பிரணவ் - அம்மா how old is vinayakar???


நான் - !!!!!!!!!!!!!!!!!!!!!!!!!


எனக்கு என்ன சொல்றதுன்னு தெரியல. அவன் கேக்கிற கேள்விக்கு ஒரளவுக்காவது புரியற மாதிரி பதில் சொல்லியாகனும். இல்லேன்னா விட மாட்டான். திருப்பி திருப்பி கேட்டுட்டே இருப்பான். அம்மா யாராவதுகிட்ட கேட்டு சொல்றேன்னு சொல்லியிருக்கேன்.

யாராவது அவனுக்கு புரியற மாதிரி எப்படி சொல்றதுன்னு சொல்லுங்களேன்.

Tuesday, August 26, 2008

மரவள்ளிக்கிழங்கு தோசை

தேவையானவை

பச்சரிசி - 11/2 கப்
புழுங்கலரிசி - 11/2 கப்
வெந்தயம் - 1 டீஸ்பூன்
(மூன்றையும் ஒன்றாக 6-8 மணி நேரம் ஊற வைக்கவும் )


மரவள்ளிக்கிழங்கு - 1 (மீடியம் சைஸ் )
வர மிளகாய் - 4
சீரகம் - 1 டீஸ்பூன்
பூண்டு - 4 பல்
உப்பு



செய்முறை

  • கிழங்கை தோல் நீக்கி சின்ன துண்டுகளாக நறுக்கவும்.

  • ஊற வைத்த அரிசி ,கிழங்கு, மிளகாய், சீரகம், பூண்டு, உப்பு சேர்த்து நன்கு தோசை மாவு பதத்திற்கு அரைக்கவும்.


  • இதை உடனே தோசை செய்யலாம். புளிக்க வைக்க தேவையில்லை.




தேங்காய் சட்னி தொட்டு சாப்பிடலாம்.

Sunday, August 24, 2008

தக்காளி சந்தகை(இடியாப்பம், சேவை)





எங்க ஊர்ப்பக்கம் இதை சந்தகைன்னுதான் சொல்லுவாங்க. ஆனா மத்த பக்கம் இடியாப்பம் அல்லது சேவைன்னும் சொல்லறாங்க. அதே மாதிரி செய்முறையும் மாறும். சந்தகை செய்யறதுக்கு நிறைய வேலை செய்யனும்கிறதால, இப்ப frozen இடியாப்பம் வாங்கிக்கறது.

தேவையானவை
frozen இடியாப்பம் - 1 பாக்கெட்
வெங்காயம் - 1 கப் (நீளவாக்கில் நறுக்கியது)
பச்சை மிளகாய் - 8
தக்காளி - 1 (நறுக்கியது)
தக்காளி பேஸ்ட் - 1 டேபிள் ஸ்பூன்(அல்லது இன்னும் 1 தக்காளி)
கறிவேப்பிலை
கடுகு
எண்ணெய்
இஞ்சி பூண்டு அரைத்த விழுது - 1 டேபிள் ஸ்பூன்

பொடிக்க
சோம்பு - 2 டீஸ்பூன்
பட்டை - 5 (1 இன்ச் அளவு)
கிராம்பு - 2
ஏலக்காய் - 2
கசகசா - 1 டீஸ்பூன்

செய்முறை

  • இடியாப்பத்தை microwave ல் சூடு பண்ணிக்கொள்ளவும்.
  • கடாயில் எண்ணெய் விட்டு கடுகு, பொடி, வெங்காயம், பச்சை மிளகாய், கறிவேப்பிலை சேர்த்து வதக்கவும்.
  • பிறகு தக்காளி, தக்காளி பேஸ்ட் சேர்த்து வதக்கவும்.
  • அதில் இஞ்சி பூண்டு விழுது சேர்த்து நன்கு பச்சை வாசம் போகும் வரை வதக்கவும்.
  • பிறகு இடியாப்பம் மற்றும் உப்பு சேர்த்து நன்கு கிளறவும்.



தேங்காய் சட்னியுடன் சாப்பிட நன்றாக இருக்கும்.

Thursday, August 21, 2008

முளைப்பயிறு ஸ்பிரிங் ரோல்

தேவையானவை

எண்ணெய்
ஸ்பிரிங் ரோல் பேஸ்ட்ரி(Sheets)
மைதா மாவு - 1 டேபிள் ஸ்பூன்

For Stuffing
பெரிய வெங்காயம் - 1/4 கப் (நறுக்கியது)
முளைப்பயிறு(பாசிப்பயறு) - 1/4 கப் (நறுக்கியது)
கோஸ், 1/4 கப் (நறுக்கியது)
கேப்சிகம்(பச்சை & சிவப்பு) - 1/4 கப்(நறுக்கியது)
பூண்டு - 1 பல் (பொடியாக நறுக்கியது)
சில்லி சோய் சாஸ் - 1 டீஸ்பூன்
உப்பு
மிளகாய்த்தூள் - தேவையான அளவு


செய்முறை
  • கடாயில் எண்ணெய் விட்டு பூண்டு சேர்த்து வதக்கவும்.
  • பிறகு வெங்காயம், முளைப்பயிறு மற்றும் காய்கள் சேர்த்து உப்பு போட்டு வதக்கவும்.
  • கடைசியாக சில்லி சோய் சாஸ், மிளகாய்த்தூள் சேர்த்து வதக்கி அடுப்பை அணைக்கவும்.
  • மைதா மாவை தண்ணீரில் பேஸ்ட் மாதிரி கலந்து வைக்கவும்.
  • காய்கறிகலவை நன்கு ஆற விடவும்.

  • பிறகு பேஸ்ட்ரி ஷீடில் ஒரு டேபிள் ஸ்பூன் காய் கலவையை வைத்து ஸ்பிரிங் ரோல் மாதிரி சுற்றி அதன் முனையை மைதா பேஸ்டில் ஒட்டவும்.



  • காய்கறி கலவை முடியும் வரை செய்யவும். 10 அல்லது 12 ஸ்பிரிங் ரோல் செய்யலாம்.
  • பிறகு கடாயில் எண்ணெய் வைத்து ஒவ்வொன்றாக பொறித்து எடுக்கவும்.



Monday, August 18, 2008

தக்காளிச்சட்னி

தேவையானவை

தக்காளி - 1
பெரிய வெங்காயம் - 1
உப்பு
எண்ணெய்
கடுகு
கறிவேப்பிலை



வறுக்க
கடலைப்பருப்பு - 1 டேபிள் ஸ்பூன்
கொத்தமல்லி - 1 டேபிள் ஸ்பூன்
சீரகம் - 1/4 டேபிள் ஸ்பூன்
மிளகு - 4
வரமிளகாய் - 3





செய்முறை
  • வறுக்க வேண்டியதை சிறிது எண்ணெய் விட்டு சிவக்க வறுக்கவும்

  • மீண்டும் சிறிது எண்ணெய் விட்டு வெங்காயம் மற்றும் தக்காளியை வதக்கவும்.

  • இவை அனைத்தையும் சேர்த்து உப்பும் சேர்த்து அரைக்கவும்.

  • பிறகு கடுகு, கறிவேப்பிலை தாளித்து கொட்டவும்.






இட்லி, தோசை, பணியாரம் அனைத்திற்கும் நல்ல combination இந்த சட்னி.

Wednesday, August 6, 2008

பட்டாணி புலாவ்

தேவையானவை

பாஸ்மதி அரிசி - 3 கப்
பட்டாணி - 1 கப்

அரைக்க
இஞ்சி - ஒரு பெரிய துண்டு
பூண்டு - 6 பல்
பச்சை மிளகாய் - 6
சோம்பு - 1 டீஸ்பூன்
பட்டை - 4 சிறிய துண்டு
ஏலக்காய் - 1


தாளிக்க
பிரியாணி இலை
கடல் பாசி
மராட்டி மொக்கு
சோம்பு
பட்டை
ஏலக்காய்
கிராம்பு
வெங்காயம் - 1 பெரியது ( நீளவாக்கில் நறுக்கியது)
பச்சை மிளகாய் - 2
கறிவேப்பிலை
எண்ணெய்
நெய்


முந்திரி

செய்முறை


  • அரிசியை கழுவி ஊற வைக்கவும்.

  • ஒரு கடாயில் எண்ணெய் மற்றும் நெய் விட்டு பிரியாணி இலை, கடல் பாசி, மராட்டி மொக்கு, சோம்பு, பட்டை, ஏலக்காய், கிராம்பு சேர்த்து, பிறகு வெங்காயம் , பச்சை மிளகாய் , கறிவேப்பிலை சேர்த்து வதக்கவும்.

  • அத்துடன் அரைத்தவற்றை சேர்த்து பச்சை வாசம் போகும் வரை வதக்கவும்.

  • இவற்றுடன் பாஸ்மதி அரிசி, 4 கப் தண்ணீர், உப்பு சேர்த்து rice cookerல் வைக்கவும்.

  • கடைசியாக முந்திரியை நெய்யில் வறுத்து சேர்க்கவும்.
குருமாவுடன் சாப்பிடலாம்.
வேண்டுமானால் தேங்காய்ப்பால் 1 கப் சேர்க்கலாம்.

பாசிப்பருப்பு பாயசம்

தேவையானவை
பாசிப்பருப்பு - 3/4 கப்
வெல்லம் - 1/2 கப்
முந்திரி - 10
திராட்க்ஷை - 10
நெய் - 1 டேபிள் ஸ்பூன்




அரைக்க
தேங்காய் - 2 டேபிள் ஸ்பூன்
பச்சரிசி - 1 டேபிள் ஸ்பூன்
ஏலக்காய் - 4






செய்முறை
  • பாசிப்பருப்பை மலர வேகவைக்க வேண்டும்.
  • அத்துடன் அரைத்தவற்றை சேர்த்து கொதிக்க விடவும்
  • பிறகு வெல்லம் சேர்த்து, அது கரைந்தவுடன் இறக்கவும்.
  • நெய்யில் முந்திரி, திராட்க்ஷை வறுத்து பாயசத்துடன் சேர்க்கவும்.



Tuesday, July 29, 2008

ஸ்டஃப்டு கத்தரிக்காய்

தேவையானவை:
கத்திரிக்காய் - 15 ( சிறியது)
எண்ணெய் - 2 டேபிள்ஸ்பூன்



நிலக்கடலை - 1/4 கப் ( வறுத்து பொடித்தது)
மிளகாய்த்தூள் - 1 1/2 டீஸ்பூன்
மல்லித்தூள் - 1 டீஸ்பூன்
சீரகத்தூள் - 1/2 டீஸ்பூன்
கரம் மாசாலா - 1/2 டீஸ்பூன்
உப்பு



செய்முறை

  • ஒவனை 300 டிகிரி சூடு படுத்தவும்.

  • கத்திரிக்காயை ஸ்டஃப் பண்ண வசதியாக நறுக்கவும் . (காம்பு பகுதியை விட்டு மத்த பகுதியை பாதி வரை நறுக்கவும்)

  • பொடிகளை ஒன்றாக கலந்து முடிந்தவரை கத்திரிக்காயில் திணிக்கவும்.

  • ஒரு கடாயில் எண்ணய் விட்டு கத்திரிக்காய் சேர்த்து உடைந்து விடாமல் மெதுவாக திருப்பவும்.(காயின் எல்லா பக்கமும் எண்ணெய் படுமாறு திருப்ப வேண்டும்)

  • பிறகு ஒவனில் வைத்து விடவும்.

  • 20-30 நிமிடங்களில் கத்திரிக்காய் வெந்து விடும்.

ஒவனில் வைக்கும் போது அலுமினியம் ஃபாயிலில் மூடி வைத்தால் வறண்டு விடாமல் இருக்கும்.

இந்த முறையில் செய்தால் எண்ணெய் அதிகம் தேவைப்படாது.

நிலக்கடலையை நன்றாக பொடிக்க கூடாது.


Sunday, July 27, 2008

தக்காளி சாதம் OR பிரியாணி



தேவையானவை
பாஸ்மதி அரிசி - 3 கப்

மிளகாய்த்தூள் - 2 டீஸ்பூன்
உப்பு
இஞ்சி, பூண்டு விழுது - 3 டேபிள்ஸ்பூன்
தக்காளி paste - 2 டேபிள்ஸ்பூன்
(தக்காளியும் உபயோகிக்கலாம், pasteல் கலர் நல்லா இருக்கும் )
வெங்காயம் - 2 நீளமாக நறுக்கியது
பச்சை மிளகாய் - 2
கறிவேப்பிலை
மல்லி இலை
புதினா இலை
சோயா உருண்டைகள் - 30 ( சுடு நீரில் போட்டு பிழிந்து எடுக்கவும்)

பொடிக்க
பட்டை - 5 (1 இன்ச் அளவு)
கிராம்பு - 2
ஏலக்காய் - 2
சோம்பு - 1 டேபிள்ஸ்பூன்
கசகசா - 1 டேபிள்ஸ்பூன்
(மிக்ஸியில் போட்டு பொடி பண்ணவும்)

தாளிக்க

எண்ணெய் - 3 டேபிள்ஸ்பூன்

நெய் - 1 டேபிள்ஸ்பூன்(optional )

கடுகு

பிரியாணி இலை

கடல் பாசி

மராட்டி மொக்கு





செய்முறை

நான் பாத்திரத்தில் செய்து ovenல் வைப்பேன். வேண்டுமானால் குக்கரில் வைக்கலாம்.

குக்கரில் வைப்பதாக இருந்தால் அதிலேயே தாளித்து விடலாம். ovenல் வைப்பதாக இருந்தால் oven safe பாத்திரத்தில் தாளித்து விடலாம்.


  • அரிசியை ஊற வைக்கவும். ovenஐ 350F ல் செட் செய்யவும்.

  • பாத்திரத்தில் எண்ணெய்+நெய் விட்டு கடுகு,பிரியாணி இலை, கடல் பாசி, மராட்டி மொக்கு, பொடி, வெங்காயம், மிளகாய், கறிவேப்பிலை சேர்த்து வதக்கவும்.
  • அதில் இஞ்சி பூண்டு விழுது சேர்த்து பச்சை வாசம் போகும்வரை வதக்கவும்.
  • பிறகு சோயா உருண்டைகள், தக்காளி பேஸ்ட், மிளகாய்த்தூள், உப்பு சேர்த்து வதக்கவும்.
  • அதில் 5 கப் தண்ணீர் சேர்த்து கொதிக்க விடவும்.
  • தண்ணீர் கொதித்தவுடன் அரிசியை சேர்த்து நன்கு கிளறி விடவும்.
  • ஒரள்வு அரிசி வெந்தவுடன், மல்லி இலை, புதினா இலை சேர்த்து கிளறி, பாத்திரத்தை எடுத்து ovenல் வைத்து 20-30 நிமிடங்கள் கழித்து வெளியே எடுக்கவும்.
இதில் சோயா உருண்டைகள் சேர்க்காமலும் செய்யலாம். என் பையனுக்கும், பொண்ணுக்கும் சோயா உருண்டைகள் பிடிக்கும். அதனால் எல்லா மசாலா சமையலிலும் சேர்த்து விடுவேன்.

மல்லி, புதினா கடைசியில் சேர்ப்பதால் நல்ல மணம் இருக்கும்.




பாசிப்பயறு கடைசல்

தேவையானவை

பாசிப்பயறு(முழுப்பயறு) - 1 கப்
பெரிய வெங்காயம் - 1/2 அல்லது சின்ன வெங்காயம் - 10 நறுக்கியது
பச்சை மிளகாய் - 4 நறுக்கியது
பூண்டு - 2 பல் நறுக்கியது
கொத்தமல்லி - 1/2 டீஸ்பூன்
சீரகம் - 1/2 டீஸ்பூன்
கறிவேப்பிலை சிறிது
எண்ணெய்


செய்முறை


  • பாசிப்பயறை நன்றாக வேகவைக்கவும் (குக்கரை விட சட்டியில் வைத்து வேகவைத்தால் நல்லா இருக்கும்)


  • பாத்திரத்தில் எண்ணெய் விட்டு கொத்தமல்லி, சீரகம் தாளித்து வெங்காயம், பூண்டு, மிளகாய், கறிவேப்பிலை சேர்த்து வதக்கி வேகவைத்த பயறையும் சேர்த்து நன்றாக கொதிக்க விடவும்.


  • பிறகு பருப்பு கடையும் மத்தில் கடையவும்.
  • கடைசியில் மல்லி இலை சேர்க்கவும்.

இதுவும் கொங்கு நாடு ஸ்பெசல்.

சாதத்துடன் சாப்பிடலாம்.

Sunday, July 20, 2008

கொள்ளு குழம்பு

தேவையானவை
கொள்ளு - 1 கப்
வரமிளகாய் - 3
மல்லி - 1 டீஸ்பூன்
சீரகம் - 1/2 டீஸ்பூன்
மஞ்சள்தூள் - 1/2 டீஸ்பூன்
கறிவேப்பிலை
பெரிய வெங்காயம் - 1/2 அல்லது சின்ன வெங்காயம் - 8 நறுக்கியது
பூண்டு - 3 பல் நறுக்கியது
எண்ணெய்
கடுகு



செய்முறை

  • கொள்ளை குக்கரில் வைத்து 3 கப் தண்ணீர் விட்டு 4 விசில் வரும்வரை வைத்து எடுக்கவும்

  • வேக வைத்த கொள்ளு, வரமிளகாய், மல்லி, சீரகம், மஞ்சள்தூள் சேர்த்து மிக்சியில் நன்கு அரைக்கவும். வேண்டுமானால் வேக வைத்த தண்ணீர் சேர்க்கலாம்.

  • கடாயில் எண்ணெய் விட்டு கடுகு, கறிவேப்பிலை தாளித்து வெங்காயம், பூண்டு சேர்த்து வதக்கவும்.

  • அத்துடன் அரைத்தவற்றை சேர்த்து ஒரு கொதி விட்டு எடுக்கவும்.



இது கொங்கு நாடு ஸ்பெசல் கொள்ளு குழம்பு.













Friday, July 18, 2008

கேரட் தயிர் குழம்பு



தேவையானவை:





தயிர் - 1 கப்

கேரட் 1/2 கப்

அரைக்க :
தேங்காய் - 1/2 கப்

சீரகம் - 1 டீ ஸ்பூன்

பச்சை மிளகாய் - 4

தாளிக்க :

எண்ணெய்

கடுகு

கறிவேப்பிலை

செய்முறை:



  • கேரட்டை துறுவி வைக்கவும்


  • அரைக்க வேண்டியவற்றை விழுதாக அரைக்கவும்


  • அரைத்த விழுது, தயிர், கேரட் மற்றும் உப்பு கலந்து வைக்கவும்


  • தாளிக்கும் கரண்டியில் எண்ணெய் விட்டு கடுகு, கறிவேப்பிலை தாளித்து , கலந்து வைத்த குழம்பில் கலக்கவும்.


ஈசி் தயிர் குழம்பு ரெடி.

சாதம், பருப்பு உடன் கலந்து சாப்பிடலாம்.

கேரட் தவிர பீட்ரூட் அல்லது வேகவைத்த பூசணி சேர்க்கலாம்.















Tuesday, July 8, 2008

அரைச்சு விட்ட சாம்பார்

வேக வைக்க
துவரம் பருப்பு - 1 கப்

வறுத்து அரைக்க
வர மிளகாய் - 8
மல்லி - 1 மேசைக்கரண்டி
கடலைப்பருப்பு - 1 மேசைக்கரண்டி
சீரகம் - 1 தேக்கரண்டி
மிளகு - 1/2 தேக்கரண்டி
வெந்தயம் - 1/2 தேக்கரண்டி
தேங்காய் - 1 மேசைக்கரண்டி(optional)
நன்கு வறுத்து சிறிது நீர் சேர்த்து அரைத்து வைக்கவும்.

மற்றவை :
காய் : முருங்கை, வெள்ளைப்பூசணி, கேரட் (அல்லது விருப்பம்போல்)
ஒரே அளவாக நறுக்கி வைக்கவும்.

பெரிய வெங்காயம் - 1 அல்லது சிறிய வெங்காயம் - 15

தக்காளி - 1 நறுக்கி வைக்கவும்


புளிக்கரைசல் , வெல்லம்

தாளிக்க :

கடுகு, பெருங்காயம், கறிவேப்பிலை, நெய் (optional)

  • கடாயில் எண்ணெய் விட்டு வெங்காயம், தக்காளி சேர்த்து வதக்கவும்.

  • காய் சேர்த்து வதக்கி சிறிது தண்ணீர் , உப்பு மற்றும் அரைத்த மசாலாவில் பாதி சேர்த்து வேக விடவும்.

  • காய் நன்கு வெந்ததும், வேக வைத்த பருப்பு, புளிக்கரைசல், மீதி உள்ள மசாலா சேர்த்து கொதிக்க விடவும்.

  • பிறகு சிறிது வெல்லம் சேர்த்து அடுப்பை நிறுத்தவும்.

  • தாளிக்கும் கரண்டியில் நெய் சேர்த்து கடுகு, பெருங்காயம்,கறிவேப்பிலை தாளித்து சாம்பார் உடன் சேர்க்கவும்.

கொத்தமல்லி இலை சேர்க்கவும்.



இட்லி, தோசை மற்றும் பொங்கல் உடன் சேர்த்து சாப்பிடலாம்



Sunday, July 6, 2008

அவல் பாயசம்

முதல் தடவையா வீட்டுக்கு வரவங்களுக்கு இனிப்பு கொடுக்கனும்னு எங்க அம்மா சொல்லியிருக்காங்க. அதனால முதல்ல அவல் பாயசம்.



முதல்ல தேவையானதெல்லாம் எடுத்துக்கனும்





அவல் - 1 கப்

சர்க்கரை - 1 1/2 கப்

பால் - 1 கப்

நெய்

முந்திரி

திராட்சை





அரைக்க : தேங்காய் , ஏலக்காய்








  • முந்திரி & திராட்சையை நெய் விட்டு நல்லா வறுத்து எடுத்து தனியா வைக்கனும்

  • இன்னும் கொஞ்சம் நெய் விட்டு அவலை சிவக்க வறுக்கனும்.

  • பிறகு பால் சேர்த்து வேக வைக்கனும்.( தண்ணீர் வேண்டுமானால் சேர்க்கலாம்.

  • நன்றாக வெந்தவுடன் சர்க்கரை சேர்த்து கரைந்தவுடன், அரைத்தவற்றை சேர்த்து ஒரு கொதி விட்டு இறக்கி வறுத்த முந்திரி & திராட்சை சேர்க்க வேண்டும்.


பாயசம் கெட்டியாக இருந்தால் இன்னும் கொஞ்சம் பால் சேர்க்கலாம்.




Monday, June 16, 2008

வணக்கம்

ரொம்ப நாளா பதிவு எழுதனும்னு ஆசை(சும்மா ஒரு 2 வருஷமாத்தான்). என்ன எழுதறதுன்னு தெரியாம இருந்தேன். இப்ப நான் சமைப்பதில் நல்லா இருக்கறத இங்க சேமிக்கலாம்னு நினைக்கிறேன். இல்லேன்னா அடுத்த முறை செய்யறப்போ மறந்து போகுது அதுதான்.

Related Posts with Thumbnails