என் சமையலறையில்

எளிய முறை கார்ன் சாலட்

2011-11-05T11:22:00.004-04:00

தேவையானவை:

கார்ன் --- 2 கப்

ஹாலப்பினோ மிளகாய் - 1

உப்பு, மிளகுத் தூள் -தேவையான அளவு

மல்லித்தளை - பொடியாக நறுக்கியது - சிறிது

செய்முறை:

மக்காச் சோளத்தை உதிர்த்து(அல்லது frozen corn) சிறிது நீர் மற்றும் உப்பு சேர்த்து வேக வைக்கவும். microwave ல் 3 நிமிடம் வைத்தால் போதும்.
ஹாலப்பினோ மிளகாயை விதை நீக்கி பொடியாக நறுக்க
வும்.
தண்ணீரை வடித்து விட்டு அதில் நறுக்கி மிளகாய், மல்லித்தளை மிளகுத்தூள் சேர்த்து கலக்கவும்.

தக்காளியையும் விதை நீக்கி பொடியாக நறுக்கி சேர்க்கலாம்.

பூக்கும் விடியல்கள்

2011-09-14T21:22:00.001-04:00

விழிகளில்.............

நேற்றைய கண்ணீரின்

ஈரங்கள்

நினைவுகளில்............

நடந்து வந்த பாதையின்

நிஜங்கள்

காற்றில்................

ஊர்வலம் போயின

சில நினைவுகள்

நிஜங்களில்........

சிதைந்தன பல

எண்ணங்கள்

ஆத்மாக்களில்...........

தேடப்பட்டன பல

உறவுகள்

தேடல்களில்

தொலைந்து போனோம்

நாம்.........

போன காலங்களால்

புரிந்து கொள்வோம்

பூக்கும் விடியல்களின்

புதிய வரவை!

புதிய உறவை!

என் வீட்டு தோட்டத்தில்

2011-05-10T22:12:00.014-04:00

இங்கே வந்து தோட்டம் போடணும்கற ஆசை ஒரு வழியா இந்த வருஷம் நிறைவேறுச்சு. ஃபிப்ரவரி மாசத்துலயே மண்ணு வாங்கி, பாத்தி கட்டி ஆரம்பிச்சாச்சு. இப்போ இருக்கற நிலவரம் இது.

Raised bed garden.

மஞ்சள்

வாழை
ஸ்பினாச்
வாழை & தண்டங்கீரை
பீர்க்கங்காய்
அவரை
கத்தரி
வெண்டைக்காய்
மிளகாய்

தக்காளி

மல்லி
பொன்னாங்கண்ணி கீரை

துளசி

செங்கீரை (கீரையே இல்லியேன்னு பாக்கறீங்களா, இதோ கீழ இருக்குது)

பறிச்சு பொரியல் பண்ணி சாப்டாச்சு. இந்தியா போயிட்டு வந்து அடுத்த update போடறேன். இந்தியா போயிட்டு Augustலதான் வரப்போறேன். அதனால ஒரு long leave.

அன்னாசி & தர்பூசணி ஜூஸ்

2011-04-19T10:02:00.008-04:00

தேவையானவை

அன்னாசித்துண்டுகள் - 1 கப்

தர்பூசணித்துண்டுகள் - 1 கப்

தேன் - 1 டீஸ்பூன்

செய்முறை

எல்லா பொருள்களையும் மிக்ஸியில் சேர்த்து நன்கு அரைக்கவும்.

வெயிலுக்கு ஏற்றது. ஐஸ் துண்டங்கள் வேண்டுமானால் சேர்க்கலாம்.

மேனகா கொடுத்த விருதுக்கு நன்றி!!

ஃப்ரூட் சாலட்(Fruit Salad)

2011-04-12T22:35:00.007-04:00

இது மிகவும் சுலபமான மற்றும் சுவையான dessert.

தேவையானவை:

Whip Cream - 1 cup

மாம்பழக்கூழ் (Mango pulp) - 1/4 cup

பழக்கலவை - பொடியாக நறுக்கியது

(ஆப்பிள், ஸ்ட்ராபெர்ரி, திராட்சை, ஆரஞ்சு, மாதுளை.......)

செய்முறை:

விப் க்ரீமுடன் மாம்பழக்கூழை சேர்த்து நன்கு கலந்து ஃப்ரிட்ஜ்ல் வைக்கவும்.
பழங்களை பொடியாக நறுக்கி வைக்கவும்.

பழங்களை க்ரீம் கலவையுடன் கலந்து

சிறிது நேரம் ஃப்ரிட்ஜ்ல் வைத்து சாப்பிடலாம்.

ஒரு கப்பில் சிறிது பழங்கள், சிறிது க்ரீம்கலவை, பழங்கள், க்ரீம் கலவை என்று அடுக்கி சாப்பிடலாம்.

வெஜ்ஜி பஃப் ஹார்ட்ஸ் (Vegetable puff hearts)

2011-02-13T09:19:00.008-05:00

இது மகி செய்த வெஜ் பேஸ்ட்ரி வீல்ஸ் மாதிரியேதான் கொஞ்சம் மாற்றி செய்துள்ளேன். Valentine's day special

தேவையானவை

பஃப் பேஸ்ட்ரி ஷீட் - 1

முட்டை - 1

ஸ்டஃபிங் செய்ய:

உருளைகிழங்கு - 1

கேரட் - 1/2

காளிஃபிளவர் - 1/4

பீன்ஸ் - 5

பட்டாணி - 1/4 கப்

வெங்காயம் - 1/4

தக்காளி - 1/2

பச்சைமிளகாய் - 2

மிளகாய்த்தூள் - 1 டீஸ்பூன்

கரம் மசாலா - 1/4 டீஸ்பூன்

மல்லித்தளை

செய்முறை

பஃப் பேஸ்ட்ரி ஷீட்டை 1 மணி நேரம் முன்பு ஃப்ரீஸரில் இருந்து எடுத்து வெளியே வைக்கவும்.
காய்களை நறுக்கி குக்கரில் வைத்து 2 விசில் விட்டு எடுக்கவும்.
வெங்காயம், பச்சைமிளகாய், தக்காளி மற்றும் மல்லித்தளையை பொடியாக நறுக்கி வைக்கவும்.
கடாயில் எண்ணெய் விட்டு வெங்காயம், மிளகாய் , தக்காளி சேர்த்து வதக்கவும்.
வேக வைத்த காய்களை நன்கு மசித்துக்கொள்ளவும்.
வதங்கிய வெங்காயத்துடன் மிளகாய்த்தூள், கரம்மசாலாத்தூள், உப்பு சேர்த்து கலந்து, மசித்த காய்களையும் சேர்த்து நன்கு கலந்து கொதிக்கவிடவும்.
எண்ணெய் பிரிந்து வரும்வரை கொதிக்கவிடவும்.
பிறகு பேஸ்ட்ரி ஷீட்டை விரித்து சிறிது மைதா மாவு தூவி தேய்த்து கொள்ளவும்.
கய்கறி மசாலாவை பேஸ்ட்ரி ஷீட்டில் நன்கு பரத்தவும்.
பிறகு அதன் ஒரு பக்கமிருந்து உள்புறமாக ரோல் செய்து பாதியில் நிறுத்தவும்.
அதன் மறுபுறம் இருந்தும் உள்புறமாக ரோல் செய்யவும்.
மத்தியில் இரண்டுபுறமிருந்தும் ரோல் செய்ததை ஒன்றன் மேல் ஒன்று இருக்குமாறு செய்து , பிளாஸ்டிக் ஷீட்டில் சுற்றி ஃப்ரீஸரில் சிறிது நேரம் வைக்கவும்.
பிறகு அதை வெளியில் எடுத்து கத்தியில் நறுக்கி பேக்கிங் ட்ரேயில் சிறிது இடம் விட்டு அடுக்கவும்.
முட்டையில் சிறிது தண்ணீர் விட்டு நன்கு அடித்து எடுத்து , ட்ரேயில் வைத்த பஃப்ல் தடவவும்.
400F முற்சூடு செய்த அவனில் 10 - 13 நிமிடம் வைத்து எடுக்கவும்.

முட்டை இல்லாமலும் செய்யலாம். எண்

ணெய் ஸ்ப்ரே செய்தால் போதும்.

ஆலூ ஸ்பினாச் சப்பாத்தி

2011-01-27T11:48:00.006-05:00

தேவையானவை:

கோதுமை மாவு - 2 கப்

உருளைக்கிழங்கு - 1

ஸ்பினாச் - 1/2 கட்டு

மிளகாய்த்தூள் - 1 டீஸ்பூன்

கரம் மசாலா தூள் - 1/2 டீஸ்பூன்

உப்பு

எண்ணெய்

செய்முறை:

உருளைக்கிழங்கையும் ஸ்பினாச்சையும் தனித்தனியாக வேக வைக்கவும்.
நன்கு கையால் மசித்துக்கொள்ளவும்.
அத்துடன் எண்ணெய் தவிர அனைத்தையும் சேர்த்து நன்கு கலக்கவும்.
ஸ்பினாச் மற்றும் ஆலூ வேக வைத்த நீரை சேர்த்து சப்பாத்தி மாவு பதத்திற்கு பிசையவும்.
மாவை நன்கு மூடி 1/2 மணி நேரம் வைக்கவும்.
பிறகு சிறிய உருண்டைகளாக உருட்டி சப்பாத்தியாக போட்டு எடுக்கவும்.

மொச்சைக்கொட்டை கத்தரிக்காய் குழம்பு

2011-01-17T10:07:00.005-05:00

பொங்கல் எங்க ஊர்லயெல்லாம் பட்டிப்பொங்கல் (மாட்டுப்பொங்கல்) தான் (2வது நாள்தான்) விஷேசமா இருக்கும். தோட்டத்துல பட்டி கட்டி அதுல கல் கூட்டி அடுப்பு செஞ்சு விறகெல்லாம் எடுத்துட்டு வந்து வெக்கனும். அப்பறமா மாடெல்லாம் கழுவி விட்டு அலங்காரம் பண்ணனும்.

அப்பறமா பட்டியில மாட்டுச்சாணி கொண்டு வந்து அதுல தெப்பக்குளம் கட்டணும். அப்பறம் பொங்கல் வெக்கணும்.

சாப்பிட பருப்பு, மொச்சைக்கொட்டை கத்தரிக்காய் குழம்பு, தட்டைப்பயறு அரசாணிக்காய் குழம்பு, ரசம், அரசாணிக்

காய் பொரியல், அவரைக்காய் பொரியல், ரசம், வடை, பாயசம், தயிர் இதெல்லாம் செய்யணும்.

இப்ப மொச்சைக்கொட்டை குழம்பு எப்படி செய்யறதுன்னு பாக்கலாம்.

தேவையானவை

மொச்சை - 1 கப்

கத்தரிக்காய் - 6 ( நீளவாக்கில் நறுக்கியது)

வெங்காயம் - 1/2 (நறுக்கியது)

கடுகு - 1 டீஸ்பூன்

கறிவேப்பிலை - சிறிது

புளிக்கரைசல் - 1/2 கப்

வதக்கி அரைக்க

சின்ன வெங்காயம் - 15

வரமிளகாய் - 6

சீரகம் - 1 டீஸ்பூன்

மல்லிப்பொடி - 1 டேபிள் ஸ்பூன்

மிளகு - 1/2 டீஸ்பூன்

செய்முறை

மொச்சையை 8 மணி நேரம் ஊற வைக்கவும்.
பிறகு அதைக்கழுவி குக்கரில் வைத்து 6 விசில் விட்டு வேக விடவும்.
வதக்கி அரைக்க கொடுத்துள்ளவற்றை சிறிது எண்ணெய் விட்டு வதக்கி நன்கு அரைக்கவும்.
கடாயில் எண்ணெய் விட்டு கடுகு தாளித்து, வெங்காயம் கறிவேப்பிலை சேர்த்து வதக்கவும்.
பிறகு கத்தரிக்காய் சேர்த்து வதக்கி, அதில் அரைத்த விழுதில் பாதியை சேர்த்து , புளிக்கரைசல் சேர்த்து கொதிக்கவிடவும்.
அதில் வேகவைத்த மொச்சை மற்றும் மீதி உள்ள அரைத்த விழுது சேர்த்து கொதிக்கவிடவும்.

மொச்சை குழம்பு ரெடி.

கடைசியாக சிறிது வேகவைத்த மொச்சையை அரைத்து சேர்த்தால் குழம்பு கெட்டியாக வரும்.

தேங்காய்ப்பாலும் சேர்க்கலாம்.

புதினா கத்தரிக்காய் சாதம்

2010-11-28T10:20:00.007-05:00

தேவையானவை

சாதம் உதிரியாக - 2 கப்

பச்சை கத்தரிக்காய் - 3 (நறுக்கியது)

கடுகு - சிறிது

வெங்காயம் - 1/2 (நறுக்கியது)

தக்காளி - 1/2 (நறுக்கியது)

எண்ணெய் - தேவைக்கு

அரைக்க

புதினா - 1 கட்டு

மல்லித்தளை - சிறிது

தேங்காய் - 1 டேபிள்ஸ்பூன்

பச்சைமிளகாய் - 7 அல்லது 8

புளி - சிறிது

செய்முறை

கடாயில் எண்ணெய் விட்டு கடுகு தாளித்து, வெங்காயம் சேர்த்து வதக்கவும்.
வெங்காயம் வதங்கியதும், கத்தரிக்காய் சேர்த்து வதக்கவும்.
பிறகு அதில் தக்காளி சேர்த்து வதங்கியதும்,அரைத்த விழுது, உப்பு சேர்த்து பச்சை வாசம் போக வதக்கவும்.
எண்ணெய் பிரிந்து வரும் போது சாதம் சேர்த்து கலந்து வைக்கவும்.

அப்பளம் அல்லது வடகம் சேர்த்து சாப்பிடலாம்.

இந்த நீளக்கத்தரிக்காய் சேர்த்து செய்தால் நன்றாக இருக்கும்.(படம் google உதவி)

மோர்க்குழம்பு

2010-11-17T10:27:00.005-05:00

இது காய் எதுவும் சேர்க்காமல் செய்யும் எளிமையான மோர்க்குழம்பு.

தேவையானவை

புளித்த மோர் - 1 கப்

வெங்காயம் - 1/2 (பொடியாக நறுக்கியது)

கறிவேப்பிலை - சிறிது

உப்பு

எண்ணெய்

அரைக்க

தேங்காய் - 2 டேபிள்ஸ்பூன்

துவரம்பருப்பு - 2 டேபிள்ஸ்பூன்

பச்சரிசி - 1 டேபிள்ஸ்பூன்

வரமிளகாய் - 8

சின்ன வெங்காயம் - 4

பூண்டு - 4 பல்

சீரகம் - சிறிது

கறிவேப்பிலை - சிறிது

செய்முறை:

அரைக்க கொடுத்துள்ளவற்றை தண்ணீர் சேர்த்து நன்கு அரைக்கவும்.
அத்துடன் புளித்த மோர் , உப்பு சேர்த்து கலந்து வைக்கவும்.
கடாயில் எண்ணெய் வைத்து கடுகு, தாளித்து வெங்காயம், கறிவேப்பிலை சேர்த்து வதக்கவும்.
அதில் கலந்து வைத்த கலவையை சேர்த்து சிறிது தண்ணீர் சேர்த்து நன்கு கொதிக்கவிட்டு இறக்கவும்.

சாதத்துடன் அப்பளம் சேர்த்து சாப்பிடலாம்.

ஒப்புட்டு (போளி)

2010-11-03T11:19:00.007-04:00

இதுவும் கொங்கு ஸ்பெசல் இனிப்பு.

தேவையானவை

கடலைப்பருப்பு - 4 கப்

ஏலக்காய்த்தூள் - சிறிது

அச்சு வெல்லம் - 10 பெரியது.

மைதா மாவு - 2 1/2 கப்

சர்க்கரை - சிறிது.

நல்லெண்ணெய்.

செய்முறை

மைதா மாவில் சிறிது சர்க்கரை மற்றும் தேவையான அளவு நீர் சேர்த்து சப்பாத்தி மாவும் பதத்திற்கு பிசைந்து, கடைசியாக சிறிது நல்லெண்ணெய் சேர்த்து பிசைந்து வைக்க வேண்டும்.(4 அல்லது 5 மணி நேரம் ஊற வேண்டும்)
கடலைப்பருப்புடன் தண்ணீர் சேர்த்து வேகவைத்து எடுக்கவேண்டும். குழையவிடக் கூடாது.
தண்ணீரை வடித்து சிறிது நேரம் உலர விட வேண்டும்.
பிறகு மிக்ஸியில் கடலைப்பருப்பையும் வெல்லத்தையும் சேர்த்து அரைக்க வேண்டும்.
அதில் ஏலக்காய்த்தூள் சேர்த்து கலக்க வேண்டும்.
இதை உருண்டைகளாக உருட்டி வைக்க வேண்டும்.
சிறிதளவு மைதா மாவு கலவையை எடுத்து ஒரு பிளாஸ்டிக் ஷீட்டில் வைத்து கைகளால் அழுத்தி பரப்பி விடவும்.
அதன் மேல் கடலைபருப்பு உருண்டையை வைத்து மூடவும்.
பிறகு அதை ரொட்டி போல் தட்டவும்.(1/4 இன்ச் தடிமனுக்கு இருக்க வேண்டும்)

நல்லெண்ணை தொட்டு செய்தால் கைகளில் ஒட்டாமல் செய்யலாம்.
தோசைக்கல்லில் வைத்து, சிறிது நல்லெண்ணை விட்டு சப்பாத்தி போல் சுட்டு எடுக்கவும்.

சுட்டு எடுத்தவுடன் ஒன்றின் மேல் ஒன்று வைக்க கூடாது. ஆற வைத்து அப்புறம் எடுத்து வைக்க வேண்டும். இதில் கடலைப்பருப்புடன் தேங்காய்த்துருவலை வறுத்து சேர்த்தும் செய்யலாம்.

நாலைந்து நாள்கள் வரை கெடாமல் இருக்கும்.பழத்துடன் சிறிது நெய்யும் சேர்த்து சாப்பிட்டால் நன்றாக இருக்கும்.

அனைவருக்கும் இனிய தீபத்திருநாள் நல்வாழ்த்துக்கள்

அதிரசம்(கச்சாயம்)

2010-11-02T20:35:00.005-04:00

தேவையானவை

பச்சரிசி - 3 கப்

அச்சு வெல்லம் - 6 பெரியது

ஏலக்காய்த்தூள் - சிறிது

எண்ணெய் - பொரிக்க

செய்முறை

அரிசியை 1/2 மணி நேரம் ஊற வைத்து தண்ணீரை வடித்து உலர விடவும்.
வெல்லத்துடன் 1/4 கப் தண்ணீர் சேர்த்து அடுப்பில் வைத்து பாகு காய்ச்சவும். ஒரு கம்பிப்பதம் வரும் வரை கொதிக்க விடவும்.
அதில் ஏலக்காய் தூளை சேர்க்கவும்.
மிக்ஸில் அரிசியை பொடித்து, சலித்து எடுக்கவும்(உரல்ல இடிச்சு எடுப்பாங்க).
வெல்லப்பாகு வெது வெதுப்பாக இருக்கும் போது அரிசி மாவுடன் கலந்து தளர பிசையவும்.
இதை ஒரு பாத்திரத்தில் வைத்து மூடி ஒரு நாள் வைக்கவும்.
மறுநாள் மாவை சிறு உருண்டைகளாக உருட்டி, தட்டி நடுவில் சிறு ஓட்டை செய்து சூடான எண்ணெயில், மிதமான சூட்டில் பொரித்தெடுக்கவும்.
2 நாள் கழித்து சாப்பிட்டால் நன்றாக இருக்கும்.

இதில் எள் சேர்த்து செய்யலாம். நான் மறந்துட்டேன். தீபாவளி ஸ்வீட் இது.

வெஜிடபிள் பீட்ஸா(Veggie Pizza)

2010-10-31T17:40:00.007-04:00

என் பொண்ணுக்கு Schoolல 2 நாள் முன்னாடி பீட்ஸா craft பண்ணினாங்க. வீட்டுக்கு வந்ததும் இன்னிக்கு பீட்ஸா பண்ணனும், நாந்தான் ரோல் பண்ணி டாப்பிங் எல்லாம் போடுவேன்னு சொல்லிட்டா.

இது சுகந்தி & ஸ்ரீநிகா's Pizza.

தேவையானவை

பீட்ஸா பேஸ் செய்ய:

மைதா மாவு - 4 கப்

சர்க்கரை - 2 டேபிள் ஸ்பூன்

உப்பு - 1 1/2 டீஸ்பூன்

ட்ரை ஈஸ்ட் - 2 டேபிள் ஸ்பூன்

ஆலிவ் எண்ணெய் - 2 டேபிள்ஸ்பூன்

தண்ணீர் - 1 1/2 கப்

டாப்பிங்க்கு:

பீட்ஸா சாஸ்

மாஸரெல்லா சீஸ் - 1 பாக்கெட்

குடமிளகாய்

ஆலிவ்

ஹாலப்பினோ பெப்பர்

மஷ்ரூம்

வேற ஏதாவது காய் வேணும்னாலும் சேர்த்துக்கொள்ளலாம்.

செய்முறை

வெது வெதுப்பான தண்ணீரில் சர்க்கரை, உப்பு , ஈஸ்ட் கலந்து 5 நிமிடங்கள் வைக்கவும்.
அதில் மைதா மாவு, ஆலிவ் எண்ணெய் சேர்த்து நன்றாக பிசையவும். மாவு தளர்வாக இருக்க வேண்டும். 4 கப் மாவுக்கு 1 1/2 கப் தண்ணீர் சரியாக இருக்கும்.
மாவு இருக்கும் பாத்திரத்தை clear wrap கொண்டு மூடி வைக்கவும்.
2 மணி நேரத்தில் மாவு இரண்டு மடங்காக உப்பியிருக்கும்.
அதை மறுபடியும் நன்றாக பிசைந்து, இரண்டாகப்பிரிக்கவும்.
ஒரு பகுதியை பிசைந்து சப்பாத்தி கட்டையில் பெரிய சப்பாத்தி போல் தேய்க்கவும்.
இது thin crust pizza. க்ரஸ்ட் திக்காக வேண்டுமென்றால் மாவும் திக்காக தேய்க்க வேண்டும்.
பீட்ஸா பானில்(pan) தேய்த்த மாவை வைத்து ஒரங்களை கையால் அழுத்தி விடவும்..
பீட்ஸா சாஸை தடவி அதன் மேல் வேண்டிய டாப்பிங்கை அடுக்கி, அதன்மேல் சீஸ் தூவி விடவும்.
400 டிகிரி ஃபாரஹீட்டில் முற்சூடு செய்த அவனில் 15 லிருந்து 20 நிமிடம் பேக் செய்யவும்.

இந்த அளவுக்கு 2 பீட்ஸா செய்யலாம். ஒரு வெஜ்ஜி பீட்ஸாவும் 1 ஆலிவ் பீட்ஸாவும் செய்தோம்.

உருளைக்கிழங்கு வெண்டைக்காய் கறி

2010-10-16T16:33:00.006-04:00

தேவையானவை

உருளைக்கிழங்கு - 2

வெண்டைக்காய் - 1/2 kg

வெங்காயம் - 1/2 (பொடியாக நறுக்கியது)

தக்காளி - 1 சிறியது (பொடியாக நறுக்கியது)

மிளகாய்த்தூள் - 1 1/2 டீஸ்பூன்

கரம் மசாலாத்தூள் - 1 டீஸ்பூன்

நிலக்கடலை - 2 டேபிள்ஸ்பூன்

சீரகம் - 1 டீஸ்பூன்

எண்ணெய்

உப்பு

செய்முறை

உருளைகிழங்கை சிறிய துண்டுகளாக நறுக்கி பாதி வேக வைக்கவும்.
வெண்டைக்காயை நறுக்கி, கடாயில் சிறிது எண்ணெய் சேர்த்து, சிறுதீயில் வைத்து நன்கு வதக்கி எடுக்கவும்.
அதே கடாயில் சிறிது எண்ணெய் விட்டு சீரகம் தாளித்து, வெங்காயம் சேர்த்து வதக்கவும்.
வெங்காயம் நன்கு வதங்கியதும் உருளைக்கிழங்கு, உப்பு சேர்த்து 3 நிமிடம் வதக்கவும்.
அதில் தக்காளி சேர்த்து வதக்கி, வெண்டைக்காயை சேர்த்து மிளகாய்த்தூள், கரம் மசாலா சேர்த்து கலந்து விடவும்.
கடைசியாக நிலக்கடலையை பொடித்து தூவி இறக்கவும்.

சப்பாத்தியுடன் சாப்பிட நல்லா இருக்கும். சாதத்துடனும் சாப்பிடலாம். நிலக்கடலையை நன்றாக பொடிக்க கூடாது.

கோதுமை அல்வா

2010-10-13T16:47:00.004-04:00

தேவையானவை

கோதுமை மாவு - 1 கப்
சர்க்கரை - 2 கப்
ஏலக்காய்ப்பொடி - 1 டீஸ்பூன்
கேசரி பவுடர் - 1 சிட்டிகை
வென்னிலா எஸன்ஸ் - 2 துளிகள்
நெய் - 1 கப்
கனோலா எண்ணெய் - 1 கப்
முந்திரி - 15
உலர்ந்த திராட்சை - 15

செய்முறை

மேலே கொடுத்துள்ள பொருட்களில் நெய், எண்ணெய் தவிர அனைத்தையும் கலந்து, சிறிது தண்ணீர் சேர்த்து தோசை மாவு பதத்திற்கு கரைத்து ஒரு மணி நேரம் வைக்கவும்.
நான் ஸ்டிக் கடாயில் சிறிது நெய் விட்டு முந்திரி, திராட்சையை வறுத்து எடுத்து வைக்கவும்.
அதே கடாயில் கரைத்து வைத்த மாவை சேர்த்து நன்கு கிளறவும்.
எண்ணெய் மற்றும் நெய் மாற்றி மாற்றி சேர்த்து கிளறவும்.
எண்ணெய் கக்க ஆரம்பிக்கும்போது வறுத்து வைத்த முந்திரி, திராட்சை சேர்த்து கிளறி இறக்கவும்.

எப்பவும் கோதுமைப்பால் எடுத்து செய்ய, முதல் நாள்லருந்து வேலை செய்யனும். இது 1 1/2 மணி நேரத்துல செஞ்சறலாம். சுலபமான வேலை, சுவையாகவும் இருந்தது.

மைதா மாவிலயும் இதே போல செய்யலாம்.

மேலே இருக்கற படங்கள்ள 1 மைதா அல்வா 1 கோதுமை அல்வா எதுன்னு கரெக்டா சொல்றவங்களுக்கு அல்வா பார்சல்.

கடலை உருண்டை

2010-09-21T22:32:00.006-04:00

தேவையானவை:

நிலக்கடலை - 2 கப்

வெல்லம் - 3/4 கப் (துருவியது)

நெய் - சிறிது

செய்முறை

நிலக்கடலையை நன்றாக வறுத்து எடுத்து ஆற வைக்கவும்.
அதில் தோல் நீக்கி மிக்ஸியில் போட்டு 4 அல்லது 5 முறை pulse பண்ணவும்.(நான் முழுசா தோல் நீக்க மாட்டேன், பாதி தோல் இருக்கற மாதிரி செய்வேன்)
ஒரளவு பறு பறுப்பாக இருக்க வேண்டும்.
அத்துடன் வெல்லத்துருவலை சேர்த்து மறுபடியும் ஒரு முறை பல்ஸ் பண்ணி எடுக்கவும்.
இதை சிறிது நெய் சேர்த்து உருண்டைகளாக உருட்டி எடுக்கவும்.

சத்தான கடலை உருண்டை ரெடி. என் கணவருக்கும், பொண்ணுக்கும் ரொம்ப பிடித்தது இது.

அதிகமாக நெய் சேர்க்கவேண்டியதில்லை. உருண்டை பிடிக்கும் போது கைகளில் தடவிக்கொண்டால் போதும்.

இனிப்பு தேவைக்கு ஏற்ப வெல்ல அளவை சரி செய்து கொள்ளலாம்.

கடலை வறுக்க(நிஜமாவே நிலக்கடலைதாங்க, வேற எதுவும் இல்ல) சுலபமான முறை அவனில் வைத்து எடுக்கலாம்

300F ல் 10 - 15 நிமிடங்கள் வைத்திருந்தால் போதும்.

சீக்கிரமா செய்ய வேண்டுமானால் microwave லும் செய்யலாம். microwave ல் 2 நிமிடம் வைத்து 3 நிமிடம் standing time கொடுத்து எடுத்தாலும் நன்றாக இருக்கும்.

கோதுமை(Multi Grain) ரொட்டி

2010-09-15T08:39:00.006-04:00

தேவையானவை:

கோதுமை மாவு அல்லது multi grain மாவு - 2 கப்

மிளகாய்த்தூள் - 1 டீஸ்பூன்

உப்பு - தேவையான அளவு

வெங்காயம் - 1/2

குடமிளகாய் - 1/2

கீரை - 1 கைப்பிடி

முட்டைகோஸ் - சிறிது

கறிவேப்பிலை - சிறிது

மல்லித்தளை - சிறிது

(அனைத்தையும் பொடியாக நறுக்கவும்)

செய்முறை:

ஒரு கடாயில் சிறிது எண்ணெய் விட்டு வெங்காயம், காய்களை வதக்கி வைக்கவும்.
மாவுடன் உப்பு மிளகாய்த்தூள் சேர்த்து கலந்து, வதக்கி வைத்தவற்றையும் சேர்த்து , சிறிது சிறிதாக சுடு தண்ணீர் சேர்த்து பிசையவும்.
சப்பாத்தி மாவை விட நன்கு தளர பிசைய வேண்டும்.
சப்பாத்தி கல்லை காய வைத்து, ஒரு உருண்டை மாவை எடுத்து கல்லில் வைத்து கையால் அழுத்தி ரொட்டி போல் செய்ய வேண்டும்.
இடை இடையே தண்ணீர் தொட்டு செய்தால் கையை சுடாமல் செய்யலாம்.
அல்லது ஒரு sheet ல் மாவை வைத்து ரொட்டியாக தட்டி எடுத்து சப்பாத்தி போல் சுட்டு எடுக்கலாம்.

இதில் கேரட்டும் துருவி சேர்க்கலாம்.

நான் sujatha brand multi grain flour உபயோகித்தேன். கோதுமை அல்லது ராகி மாவிலும் செய்யலாம்.

பூண்டு குழம்பு

2010-08-20T09:54:00.006-04:00

தேவையானவை:

வெங்காயம் - 1/2 (நறுக்கியது)
தக்காளி - 1 (நறுக்கியது)
பூண்டு - 25 பல் (தோல் நீக்கி நறுக்கியது)
கறிவேப்பிலை - சிறிது
புளித்தண்ணீர் - 1 கப்

மிளகாய்த்தூள் - 1 அல்லது 1 1/2டீஸ்பூன்

தாளிக்க:
கடுகு - 1 டீஸ்பூன்
பெருங்காயம் - சிறிது

வறுத்து அரைக்க:
கடலைப்பருப்பு - 1 டேபிள் ஸ்பூன்
மல்லி விதை - 1 டேபிள் ஸ்பூன்
எள் - 1 டீஸ்பூன்
சீரகம் - 1 டீஸ்பூன்
வெந்தயம் - சிறிது
தேங்காய் - 1 டீஸ்பூன்
(நன்கு வறுத்து அரைக்கவும்)

செய்முறை:

கடாயில் எண்ணெய் விட்டு தாளிக்கும் பொருள்களை போட்டு, வெங்காயம், பூண்டு, கறிவேப்பிலை சேர்த்து வதக்கி, தக்காளியும் சேர்த்து வதக்கவும்.
நன்கு வதங்கியதும், புளித்தண்ணீர் சேர்த்து கொதிக்க விடவும்.
அரைத்த விழுதை சேர்த்து, சிறிது நீர் சேர்த்து , நன்கு கொதிக்க விட்டு எடுக்கவும்.

சாதம், உப்பு பருப்பு, பூண்டு குழம்போட நல்லா இருக்கும். செஞ்சு 2 நாள் கழிச்சு சாப்பிட்டா இன்னும் நல்லா இருக்கும்.

கத்தரிக்காய் அல்லது கோவைக்காய் சேர்த்தூம் செய்யலாம்.

புரோட்டின் அடை

2010-08-18T20:02:00.005-04:00

இங்கே பக்கத்துல இருக்கற farmers market ல 10 பீன்ஸ் சூப் மிக்ஸ் வெச்சுருந்தாங்க. இதுல பார்லி, பட்டாணி பருப்பு(பச்சை, மஞ்சள்), black beans, white beans, மசூர் பருப்பு, pinto beans, ராஜ்மா, red lentils எல்லாம் இருக்கு. அரிசி இல்லாம பார்லியோட நிறைய பருப்புங்கறதால சரி அடை செய்யலாமேன்னு முயற்சி பண்ணினேன். நல்லாவே வந்தது.

தேவையானவை:

10 பீன்ஸ் சூப் மிக்ஸ் - 2 கப்

வரமிளகாய் - 3

சீரகம் - 1 டீஸ்பூன்

பூண்டு - 3 பல்

கறிவேப்பிலை - சிறிது

உப்பு

செய்முறை:

பீன்ஸ் மிக்ஸை 8 மணி நேரம் ஊற வைக்கவும்.
அரைக்கும் போது வர மிளகாய், சீரகம், பூண்டு, கறிவேப்பிலை, உப்பு சேர்த்து தோசை மாவு பதத்திற்கு அரைத்து எடுக்கவும்.
பிறகு தோசைகளாக ஊற்றி எடுக்கவும்.

தக்காளி சட்னி , கொத்தமல்லி சட்னி அல்லது தேங்காய் சட்னியுடன் சாப்பிடலாம். சட்னி இல்லாமல் சாப்பிடவும் நல்லா இருந்தது.

சந்தகை & தேங்காய்ப்பால்

2010-08-09T14:25:00.008-04:00

சந்தகை கொங்கு பகுதியில் பிரபலமான உணவு. அதிலும் புதுசா கல்யாணமான பொண்ணு மாப்பிள்ளை விருந்துக்கு சந்தகைதான் செய்வாங்க.
சந்தகை செய்யறது ஒரு பெரிய வேலை!. முடிஞ்ச வரைக்கும் frozen வாங்கிருவேன். ஆனா எப்போவாவது வீட்லயே செய்யறதும் உண்டு.

தேவையானவை :

புழுங்கல் அரிசி - 4 கப்

செய்முறை

புழுங்கல் அரிசியை 6 மணி நேரம் ஊற வைத்து, கழுவி நைசாக அரைத்து எடுக்கவும்.
கடாயில் சிறிது எண்ணெய் விட்டு நன்கு வறுத்து எடுக்கவும்.(கொழுக்கட்டை பதம்).

வறுத்த மாவை கொழுக்கட்டைகளாக பிடித்து இட்லித்தட்டில் வைத்து வேக வைக்கவும். (அல்லது மாவை வறுக்காமல் இட்லியாக செய்தும் சந்தகை செய்யலாம்.)

கொழுக்கட்டை சூடாக இருக்கும் போதே

சந்தகை மரத்தில் வைத்து பிழிந்து எடுக்கவும்.(கொழுக்கட்டை சூடு ஆறிவிட்டால் பிழிய வராது)

இதில் தேங்காய்ப்பால் சேர்த்து சாப்பிடலாம்.

தேங்காய்ப்பால் செய்ய:

தேவையானவை

தேங்காய்- 1

ஏலக்காய் - 4

சர்க்கரை - தேவையான அளவு

செய்முறை:

தேங்காயை துருவி, ஏலக்காய் , தண்ணீர் சேர்த்து கிரைண்டரில் அரைத்து பிழிந்து பால் எடுக்கவும். (2 முறை செய்யலாம்.)
அதில் தேவையான அளவு சர்க்கரை சேர்த்து அடுப்பில் வைத்து சூடு பண்ணவும். நன்கு கலந்து விடவும்.
சர்க்கரை கரைந்து, லேசாக சூடு ஆகியதும் இறக்கி விடவும்.
கொதிக்க விடக்கூடாது.

தக்காளி சந்தகை, புளி சந்தகை அல்லது தயிர் சந்தகையும் செய்து சாப்பிடலாம்.

கம்மஞ்சோறு & கம்மங்கூழ்

2010-07-30T09:44:00.005-04:00

தேவையானவை
கம்பு - 2 கப்

செய்முறை

2 கப் கம்பு எடுத்து மிக்ஸியில் விட்டு சிறிது தண்ணீர் தெளித்து 2 முறை பல்ஸ் பண்ணி எடுக்கவும்.
அதில் தண்ணீர் விட்டு கழுவினால் கம்பின் மேல் உள்ள தவிடு நீங்கி விடும்.
ஒரு அடி கனமான பாத்திரத்தில் 6 கப் தண்ணீர் விட்டு, கொதிக்க வைத்து, கழுவி வைத்த கம்பை சேர்த்து கலக்கவும்.
5 நிமிடம் கொதித்ததும், சிறு தீயில் வைத்து, அடிக்கடி கிளறி விடவும்.
நன்கு கெட்டியானதும் மிகவும் சிறு தீயில் 5 நிமிடம் மூடி போட்டு புழுங்க விடவும்.

கம்மஞ்சோறு ரெடி.
கருவாட்டு குழம்போட நல்லா இருக்கும்னு சொல்லுவாங்க. எனக்கு தெரியல. கத்தரிக்காய் குழம்பும் நல்லா இருக்கும்.
ஆனா எங்களுக்கு பிடித்தது கூழ்.

இந்த கம்மஞ்சோறு கொஞ்சம் வெதுவெதுன்னு இருக்கறப்போவே உருண்டைகளாக உருட்டி தண்ணீரில் போட்டு வைக்க வேண்டும்.
வேணும்கறப்போ எடுத்து தயிர், உப்பு , பொடியாக நறுக்கிய சின்ன வெங்காயம் மற்றும் ஊறவைத்த தண்ணீர் கலந்து கூழாக குடிக்கலாம்.
அல்லது வெறும் தயிர், உப்பு சேர்த்து தயிர் சாதமாகவும் சாப்பிடலாம்.
ஒரு வாரம் வரைக்கும் ஃப்ரிஜ்ஜில் வைக்கலாம்.
ஃப்ரிஜ்ஜில் வைக்காமல் இருந்தால், அந்த தண்ணீரை மட்டும் தினமும் மாற்ற வேண்டும்.

அந்த தண்ணீரில் உப்பு மட்டும் கலந்து குடித்தால் நல்லா இருக்கும். புளி தண்ணீன்னு சொல்லுவாங்க.
வெய்யில் காலத்துக்கு நல்லா இருக்கும். (BTW எங்களுக்கு இப்பதான் வெய்யில் peakல இருக்குது).
கம்புல தவிடு நீக்க, உரல்ல போட்டு குத்தி எடுப்பாங்க. இங்கே நம்ம மிக்ஸியில் பல்ஸ் பண்ணி எடுக்கலாம்.

மாம்பழ ஸ்மூத்தி

2010-07-14T09:53:00.004-04:00

தேவையானவை

மாம்பழம் - 2

பால் - 1 கப்

வென்னிலா ஐஸ்கிரீம் - 2 ஸ்கூப்

தேன் - 2 டேபிள் ஸ்பூன்

செய்முறை

மாம்பழத்தை தோல் சீவி நறுக்கவும்.
அனைத்தையும் ப்ளெண்டரில் சேர்த்து நன்றாக அடித்துக் கொள்ளவும்.

மாம்பழக்கூழும் சேர்த்து செய்யலாம்.

தக்காளி சாதம்

2010-07-06T09:02:00.008-04:00

தேவையானவை

சாதம் - 2 கப்

வெங்காயம் - 1 (நீள வாக்கில் நறுக்கியது)

தக்காளி - 1(பொடியாக நறுக்கியது)

பச்சைமிளகாய் - 10 (நறுக்கியது)

கறிவேப்பிலை - சிறிது

காஷ்மீரி மிளகாய்த்தூள் - 1 டீஸ்பூன்

மல்லித்தளை - 1 கைப்பிடி (பொடியாக நறுக்கியது)

புதினா - 1 கைப்பிடி (பொடியாக நறுக்கியது)

உப்பு

அரைக்க

இஞ்சி - 1 துண்டு

பூண்டு - 4 பல்

தக்காளி - 2

பட்டை - 2 துண்டு

கிராம்பு -1

சோம்பு - 1 டீஸ்பூன்

ஏலக்காய் - 1

செய்முறை

சாதத்தை உதிரியாக செய்து வைக்கவும்.
கடாயில் எண்ணெய் விட்டு கடுகு, கடலைப்பருப்பு தாளித்து, வெங்காயம், பச்சை மிளகாய், கறிவேப்பிலை சேர்த்து வதக்கவும்.
நன்கு வதங்கியதும், தக்காளி சேர்த்து வதக்கி , அரைத்தவற்றையும், உப்பு, மிளகாய்த்தூள் சேர்த்து எண்ணெய் பிரிந்து வரும்வரை வதக்கவும்.
மல்லித்தளை, புதினா சேர்த்து கலக்கவும்.
இதில் தேவையான அளவு எடுத்து சாதத்தில் கலந்தால் தக்காளி சாதம் ரெடி.

இந்த மசாலாவை இட்லி, தோசை, சப்பாத்திக்கு தொட்டு சாப்பிடவும் உபயோகிக்கலாம்.

மாங்காய் ஊறுகாய் - II

2010-06-23T17:56:00.007-04:00

இது என் ஆந்திரா தோழி ஒருவருடைய ரெசிபி!.

தேவையானவை

மாங்காய் (பெரியது)- 2

உப்பு - 1 கப்

மிளகாய்த்தூள் - 1 1/2 கப்

கடுகுத்தூள் - 1 டேபிள்ஸ்பூன்

வெந்தயத்தூள் - 1/2 டேபிள்ஸ்பூன்

இஞ்சி - 1 பெரிய துண்டு

பூண்டு - 10 பல்

நல்லெண்ணெய் - 3கப்.

செய்முறை

மாங்காயை துண்டுகளாக நறுக்கவும். (மாங்காய் கொட்டையின் மேல் உள்ள கடினமான பகுதியும் சேர்ந்து வருமாறு நறுக்கவும்)
இஞ்சி மற்றும் பூண்டை அரைத்துக் கொள்ளவும். தண்ணீர் சேர்க்காமல் அரைக்க வேண்டும்.(நான் சிறிது நல்லெண்ணெய் சேர்த்து அரைத்தேன்)
எண்ணெய் தவிர அனைத்தையும் சேர்த்து நன்கு கலக்கவும்.
கடாயி எண்ணெயை சூடாக்கி , பிறகு ஆற வைத்து சேர்க்கவும்.
ஒரு வாரம் ஊறிய பிறகு உபயோகிக்கலாம்.

இஞ்சி பூண்டு சேர்ப்பதால் நல்ல வாசனையாக இருக்கும்.

கொள்ளு ரசம்

2010-06-23T10:53:00.008-04:00

தேவையானவை

கொள்ளு வேகவைத்த தண்ணீர் - 3 கப்

சின்ன வெங்காயம் - 1(பொடியாக நறுக்கியது)

பச்சை மிளகாய் - 2

தக்காளி - 1(பொடியாக நறுக்கியது)

புளிக்கரைசல் - 2 டேபிள்ஸ்பூன்

கறிவேப்பிலை

மல்லித்தளை

பூண்டு - 3 பல் (நன்றாக தட்டி வைக்கவும்)(crushed)

கடுகு

பொடிக்க

சீரகம் - 1டேபிள்ஸ்பூன்

மல்லி - 1/2 டீஸ்பூன்

மிளகு - 1/2 டீஸ்பூன்

வெந்தயம் - 4

(நன்கு பொடிக்கவும்) அம்மியில் பொடித்தால் நல்லா இருக்கும். நான் சின்ன கல்லில் பொடிப்பேன். மிக்ஸியும் உபயோகிக்கலாம்.

செய்முறை

கடாயில் சிறிது எண்ணெய் விட்டு கடுகு தாளித்து, வெங்காயம், பூண்டு, கறிவேப்பிலை சேர்த்து வதக்கவும்.
தக்காளி சேர்த்து நன்கு வதக்கவும்.
அதில் புளிக்கரைசல் மற்றும் ரசப்பொடி , உப்பு சேர்த்து கொதிக்கவிடவும்.
பிறகு கொள்ளு வேக வைத்த தண்ணீர் சேர்த்து கொதிக்க விட்டு இறக்கவும்.
கடைசியாக மல்லித்தளை சேர்க்கவும்.

இதை சூப் போல அப்படியே குடிக்கலாம். சாதத்துடன் சாப்பிடலாம்.

தட்டைபயறு, பாசிப்பயறு வேக வைத்த தண்ணீரிலும் இதே போல் ரசம் செய்யலாம்.

கொள்ளு பொடி

2010-06-23T10:07:00.008-04:00

இது கொங்கு நாடு ஸ்பெசல் கொள்ளுப்பொடி.

தேவையானவை

கொள்ளு - 1 கப்

சின்ன வெங்காயம் - 6 -8 (நறுக்கியது)

பச்சை மிளகாய் - 4(நறுக்கியது)

கறிவேப்பிலை

பூண்டு - 1 பல்லு

சீரகம் - 1/2 டீஸ்பூன்

மல்லி - 1/2 டீஸ்பூன்

உப்பு

செய்முறை

கொள்ளை சுத்தம் செய்து 4 கப் தண்ணீர் சேர்த்து குக்கரில் வைத்து 6 விசில் விடவும்.
பிறகு தண்ணீரை சுத்தமாக வடித்து விட்டு (ரசத்துக்கு உபயோகிக்கலாம்) கொள்ளை உலர விடவும்.
கடாயில் எண்ணெய் விட்டு மல்லி, சீரகம் தாளித்து சின்ன வெங்காயத்தில் பாதியையும், மிளகாய், கறிவேப்பிலை சேர்த்து வதக்கி எடுக்கவும்.
வதக்கி எடுத்தவற்றுடன் உலர வைத்த கொள்ளு மற்றும் மீதி உள்ள சின்ன வெங்காயம் சேர்த்து மிக்ஸியில் தண்ணீர் விடாமல் அரைத்து எடுக்கவும்.

சாதம் மற்றும் நெய்யுடன் சாப்பிட அருமையாக இருக்கும். பச்சை வெங்காயம் சேர்ப்பதால் நல்ல ருசியாக இருக்கும். நான் அதிக நேரம் உலர வைக்காம செஞ்சுட்டேன் இல்லேன்னா இன்னும் உதிரியாக வரும்.

என் சிறுவயதில் கொள்ளுப்பொடி செய்யும் போது மிக்ஸியில் அரைக்க மாட்டாங்க. உரலில் இடித்து எடுப்பாங்க. இப்ப நிறைய பேருக்கு உரல் எப்படி இருக்கும்னே தெரியாது.

ஒரு சின்ன சோகம் இதுல, கொள்ளு US ல கிடைக்கறதில்ல. இனி இந்தியா போயிட்டு வரப்ப இதையும் கொண்டு வரணும்.

கத்தரிக்காய் உருளைக்கிழங்கு கறி

2010-06-21T13:06:00.007-04:00

தேவையானவை

கத்தரிக்காய் - 3

உருளைக்கிழங்கு - 2

வெங்காயம் - 1/2

தக்காளி - 1

மிளகாய்த்தூள் - 1 1/2 டீஸ்பூன்

கடுகு

கடலைப்பருப்பு

உளுந்தம்பருப்பு

உப்பு

எண்ணெய்

செய்முறை

வெங்காயம், உருளைக்கிழங்கு, கத்தரிக்காய் மூன்றையும் நீளவாக்கில் நறுக்கி வைக்கவும்.
தக்காளியை பொடியாக நறுக்கி வைக்கவும்.
கடாயில் எண்ணெய் விட்டு கடுகு, கடலைப்பருப்பு, உளுந்தம் பருப்பு தாளித்து, வெங்காயம் சேர்த்து வதக்கவும்.
பிறகு தக்காளி, கத்தரிக்காய், உருளைக்கிழங்கு, மிளகாய்த்தூள், உப்பு சேர்த்து சிறிது தண்ணீர் விட்டு சிறு தீயில் நன்கு வேக விட்டு, தண்ணீர் வற்றியதும் இறக்கவும்.

சாதம் அல்லது சப்பாத்தியுடன் சாப்பிடலாம்.

முட்டை டோஸ்ட்(Spicy French Toast)

2010-06-19T13:10:00.009-04:00

தேவையானவை

ரொட்டி துண்டுகள் - 4

முட்டை - 2

வெங்காயம் - 1/4 (பொடியாக நறுக்கியது)

பச்சை மிளகாய் - 3 (பொடியாக நறுக்கியது)

கறிவேப்பிலை - சிறிது( பொடியாக நறுக்கியது)

மல்லித்தளை - ஒரு கைப்பிடி(பொடியாக நறுக்கியது)

உப்பு

மிளகுத்தூள்

செய்முறை

முட்டையை உடைத்து நன்கு அடித்து வைக்கவும்.
வெங்காயம், மிளகாய், கறிவேப்பிலை,மல்லித்தளை, உப்பு, மிளகுத்தூள் அனைத்தையும் சேர்த்து ஒரு அகலமான பாத்திரத்தில் கலக்கவும்.

நான் ஸ்டிக் தோசைக்கல்லை அடுப்பில் வைத்து சூடாக்கவும்.
ரொட்டியை, முட்டை கலவையில் முக்கி எடுத்து வெங்காயம் கலவை இரு புறமும் படியுமாறு, எடுத்து தோசைக்கல்லில் போடவும்.
சிறு தீயில்2 நிமிடம் வேக விட்டு திருப்பி போட்டு மறுபடியும் 2 நிமிடம் வேக விட்டு எடுக்கவும்.

காலைஉணவுக்கு ஏற்ற சத்தான ஈசியான உணவு.

டொமாட்டிலோ(Tomatillo/ Husk tomato) பருப்பு

2010-06-17T22:08:00.012-04:00

டொமாட்டிலோ அல்லது ஹஸ்க் டொமாட்டோ, பார்ப்பதற்க்கு பச்சை தக்காளி போலவே இருக்கும், ஆனால் அதன் மேல் ஒரு லேயர் இருக்கும். இது தென் அமெரிக்க சமையலில் நிறைய உபயோகப்படுத்தப்படும். புளிப்பு சுவையுடன் இருக்கும். இதில பருப்பு மாதிரி ட்ரை பண்ணினேன். மாங்காய் போட்ட சாம்பார் மாதிரி நல்லாவே இருந்தது.

தேவையானவை

துவரம் பருப்பு - 1/2 கப்

டொமாட்டிலோ - 3

வெங்காயம் - 1/2

கறிவேப்பிலை

மிளகாய்த்தூள் - 1 1/2 டீஸ்பூன்

உப்பு

எண்ணெய்

செய்முறை

ஒரு பாத்திரத்தில் தண்ணீர் விட்டு கொதிக்க வைக்கவும்.
கொதித்தவுடன் அதில் பருப்பு சேர்த்து வேக விடவும்.
டொமாட்டிலோவின் மேல் லேயரை எடுத்து விட்டு சிறு துண்டுகளாக நறுக்கவும்.
பருப்பு முக்கால் பதம் வெந்ததும் மிளகாய்த்தூள், உப்பு மற்றும் டொமாட்டிலோவை சேர்த்து வேக விடவும்.
கடாயில் எண்ணெய் விட்டு, கடுகு தாளித்து, வெங்காயம், கறிவேப்பிலை சேர்த்து வதக்கி வைக்கவும்.
பருப்பும் டொமாட்டிலோவும் நன்கு வெந்ததும் அதில் கடாயில் உள்ளவற்றை சேர்த்து ஒரு கொதி விடவும்.
பிறகு அதை எடுத்து கடைந்து வைக்கவும்.

சாதத்துடன் சாப்பிட நன்றாக இருந்தது.

பிரவுன் அவல் உப்புமா (Brown poha uppuma)

2010-06-16T11:42:00.007-04:00

தேவையானவை

பிரவுன் அவல்(மட்டை அரிசி அவல்) - 1 கப்

வெங்காயம் - 1/2 (பொடியாக நறுக்கிய

து)

பச்சை மிளகாய் - 3 (நறுக்கியது)

இஞ்சி - 1 சிறுதுண்டு(பொடியாக நறுக்கியது)

தக்காளி - 1/2 (நான் அவசரத்துல போட மறந்துட்டேன்)

கறிவேப்பிலை - சிறிது

தாளிக்க

கடுகு

கடலைப்பருப்பு

உளுந்தம்பருப்பு

உப்பு

எண்ணெய்

செய்முறை

ஒரு பாத்திரத்தில் அவல் எடுத்து, அது மூழ்கும் வரை தண்ணீர் ஊற்றி ஊற வைக்கவும்.(15 நிமிடங்கள்)
அது ஊறும் நேரத்தில் வெங்காயம், மிளகாய், தக்காளி நறுக்கி வைக்கலாம்.
கடாயில் எண்ணெய் விட்டு கடுகு, கடலைப்பருப்பு, உளுந்தம்பருப்பு தாளித்து வெங்காயம், மிளகாய், இஞ்சி, கறிவேப்பிலை, உப்பு சேர்த்து வதக்கவும்.
அதில் தக்காளி சேர்த்து நன்கு வதக்கவும்.
அது வதங்கும் நேரத்தில் அவலை தண்ணீர் போக நன்கு பிழிந்து எடுத்துக் கொள்ளவும்.
கடாயில் அவல் சேர்த்து நன்கு சூடாகும் வரை கலக்கவும்.

20 நிமிசத்துல செஞ்சரலாம். காலை நேர உணவுக்கு சீக்கிரமாகவும், சத்தாணதாகவும் சாப்பிடலாம். இதில் குட

மிளகாயும் சேர்க்கலாம்.

Sending this to Healthy recipe Hunt @ kurinjikathambam

பீட்ரூட் இலை சாம்பார்

2010-06-16T10:29:00.004-04:00

பீட்ரூட் இலையில் அதிக ஆளவு இரும்புச்சத்து உள்ளது. அத்துடன் calcium, magnesium, copper, phosphorus, sodium ஆகியவையும் உள்ளது.

(Thanks to google)

தேவையானவை:

துவரம் பருப்பு - 1 கப்

பீட்ரூட் இலை - 1 கட்டு

பூண்டு - 2 பல்

வெங்காயம் - 1/2 (பொடியாக நறுக்கியது)

தக்காளி - 1 1/2 (பொடியாக நறுக்கியது)

கறிவேப்பிலை - சிறிது

மிளகாய்த்தூள் - 1 டீஸ்பூன்

சாம்பார் தூள் - 1 டீஸ்பூன்

உப்பு

தாளிக்க

கடுகு - 1/2 டீஸ்பூன்

சீரகம் - 1/2 டீஸ்பூன்

வெந்தயம் - சிறிது

செய்முறை

பூண்டு சேர்த்து பருப்பை வேகவைக்கவும். குக்கரில் வைக்காமல், பாத்திரத்தில் வைத்து வேக வைத்தால் பருப்பு கரையாமல் இருக்கும்.
பீட்ரூட் இலையை பொடியாக நறுக்கவும்.
கடாயில் எண்ணெய் விட்டு கடுகு, சீரகம், வெந்தயம் தாளித்து, வெங்காயம், கறிவேப்பிலை சேர்த்து வதக்கவும்.
வெங்காயம் வதங்கியதும், அதில் தக்காளி சேர்த்து வதக்கவும்.
அதில் பீட்ரூட் இலை, மிளகாய்த்தூள், சாம்பார்தூள், உப்பு சேர்த்து நன்கு வதக்கவும்.
சிறிது தண்ணீர் சேர்த்து வேக விடவும்.
அதில் வேக வைத்த பருப்பு சேர்த்து கொதிக்க விடவும்.

சாதம் மற்றும் சப்பாத்தியுடன் சாப்பிடலாம்.

பிரவுன் அரிசி, பிரவுன் அவல் தோசை & கார சட்னி

2010-06-15T13:45:00.007-04:00

தேவையானவை

பிரவுன் அரிசி(brown long grain rice) - 4 கப்

உளுந்து - 1/4 கப்

பிரவுன் அவல் - 1/2 கப்

வெந்தயம் - 1 டீஸ்பூன்

உப்பு

செய்முறை

அரிசி, உளுந்து, வெந்தயம் அனைத்தையும் 6 மணி நேரம் ஊற வைக்கவும்.
அவலை 1/2 மணி நேரம் ஊற வைக்கவும்.
அனைத்தையும் சேர்த்து அரைத்து எடுத்து உப்பு சேர்த்து புளிக்க வைக்கவும்.
தோசைகளாக ஊற்றி எடுக்கவும்.

தோசை ஸ்பான்ஞ் மாதிரி மிருதுவாக இருக்கும்.கார சட்னியுடன் சாப்பிட நல்லா இருக்கும். இதில் அவல் சேர்க்காமல் செய்தால் நல்ல க்ரிஸ்பியாக வரும்.

ஈசி கார சட்னி

வெங்காயம் - 1

தக்காளி - 1

மல்லித்தளை - 1/4 கட்டு

வரமிளகாய் - 2

சீரகம் - 1/2 டீஸ்பூன்

புளி சிறிது

உப்பு

அனைத்தையும் சேர்த்து அரைத்து எடுத்து, சிறிது நல்லெண்ணெய் தாளித்து கொட்டவும்.

ஸ்ட்ராபெர்ரி/பாதாம்/வாழைப்பழ ஸ்மூத்தி(strawberry/ almond/ Banana Smoothie)

2010-06-11T18:23:00.006-04:00

தேவையானவை

ஸ்ட்ராபெர்ரி - 10
வாழைப்பழம் - 1
சோயா பால் - 1 கப்
தேன் - 1 டேபிள்ஸ்பூன்
பாதாம் - 4

செய்முறை

மிக்ஸியில் ஸ்ட்ராபெர்ரி, ஊற வைத்த பாதாம் மற்றும் வாழைப்பழம் சேர்த்து நன்கு அரைக்கவும்.
அதில் சோயாபால் மற்றும் தேன் சேர்த்து அரைக்கவும்.
healthy smoothie is ready.

புதுமனை புகுவிழா

2010-06-05T20:00:00.013-04:00

ஒரு மாசமா ப்ளாக் பக்கம் வர முடியாத அளவுக்கு வேலை. அன்பா விசாரிச்சவங்களுக்கு ரொம்ப நன்றி!!!.

இப்படி ஆரம்பிச்சதுதான்.

இது ஒருவாரத்திற்கு அப்புறம்

இது ஒரு மாசத்துக்கு அப்புறம்.

மூணு மாசத்துல இப்படி கட்டி முடிச்சுட்டாங்க.

பூஜை வெள்ளிக்கிழமை நல்ல படியா நடந்தது.

இது நம்ம சமையல் சாம்ராஜ்யம்!!!!!! பால் பொங்கியாச்சு. அடுத்த வாரம் புது வீட்டுக்கு போயிருவோம். அதுக்கப்பறம் பதிவுகள் தொடரும்.

பாசிப்பருப்பு செளசெள கூட்டு

2010-05-11T08:28:00.008-04:00

தேவையானவை

பாசிப்பருப்பு - 1/2 கப்

செளசெள - 1

வெங்காயம் - 1/2 (நறுக்கியது)

மஞ்சள்தூள் - 1 டீஸ்பூன்

கறிவேப்பிலை - சிறிது

உப்பு

அரைக்க

தேங்காய் - 1 டேபிள்ஸ்பூன்

பச்சை மிளகாய் - 4

சீரகம் - 1 டீஸ்பூன்

கறிவேப்பிலை - சிறிது

செய்முறை

பாசிப்பருப்பை மஞ்சள் தூள் சேர்த்து மலர வேகவிடவும்.
கடாயில் எண்ணெய் விட்டு கடுகு தாளித்து , வெங்காயம், கறிவேப்பிலை சேர்த்து வதக்கவும்.
அதில் நறுக்கிய காய் சேர்த்து வதக்கவும்.
காய் நன்கு வதங்கியதும் அதில் பருப்பு, மற்றும் அரைத்தவற்றையும் சேர்த்து கொதிக்க விடவும்.

சாதம் மற்றும் சப்பாத்தியுடன் சாப்பிடலாம்.

காய்கறி பக்கோடா

2010-05-03T09:44:00.006-04:00

தேவையானவை

கடலை மாவு - 1 கப்

அரிசி மாவு - 1/4 கப்

பூண்டு - 3 பல்

சீரகம் - 1 டீஸ்பூன்

மிளகாய்த்தூள் - 2 டீஸ்பூன்

உப்பு

கறிவேப்பிலை - சிறிது

எண்ணெய்

காளிஃப்ளவர்

குட மிளகாய்

புரோக்கலி

வெங்காயம்

மல்லித்தளை

வெந்தயக்கீரை

செய்முறை

காய்களை உப்பு சேர்த்து கலந்து வைக்கவும்.
பூண்டு, சீரகம், மிளகாய்த்தூள் சேர்த்து நன்கு அரைத்து எடுக்கவும்.
காய்களுடன் கடலை மாவு, அரிசி மாவு மற்றும் அரைத்து வைத்ததையும் சேர்த்து பிசறி வைக்கவும்.

எண்ணெயை காய வைத்து, சிறிது சிறிதாக போட்டு நன்கு வேக விட்டு எடுக்கவும்.

எல்லா காய்களும், கீரையும் சேர்க்கலாம்.

புதினா துவரை புலாவ்

2010-04-28T16:13:00.006-04:00

தேவையானவை

பாஸ்மதி அரிசி - 2 கப்

வெங்காயம் - 1 (நீள்வாக்கில் நறுக்கியது)

கறிவேப்பிலை - சிறிது

துவரை - 1 கப் (frozen thuvar lilva)

பிரியாணி இலை - சிறிது

ஏலக்காய் - 1

முந்திரி - சிறிது

தேங்காய்ப்பால் - 1 கப்

நெய் - 1 டேபிள்ஸ்பூன்

அரைக்க

புதினா - 1 கட்டு

மல்லி - 1/2 கட்டு

இஞ்சி - 1 துண்டு

பூண்டு - 4 பல்

பச்சைமிளகாய் - 8

பட்டை - 1 துண்டு

கிராம்பு - 2

சிறிது நீர் சேர்த்து அரைக்கவும்.

செய்முறை

குக்கரில் எண்ணெய், நெய் சேர்த்து பிரியாணி இலை, ஏலக்காய், முந்திரி சேர்த்து வதக்கவும்.
அரிசியை கழுவி ஊற வைக்கவும்.
முந்திரி சிவந்ததும், வெங்காயம், கறிவேப்பிலை சேர்த்து வதக்கவும்.
பிறகு அதில் துவரை சேர்த்து வதக்கி, அரைத்தவற்றை சேர்த்து, உப்பும் சேர்த்து பச்சை வாசம் போகும்வரை வதக்கவும்.
அதில் அரிசி சேர்த்து வதக்கி, தேங்காய்ப்பால் மற்றும் 3 கப் தண்ணீர் சேர்த்து கலந்து மூடி போடவும்.
2 விசில் விட்டு இறக்கவும்.

துவரைக்கு பதிலாக, frozen soya bean, அல்லது ஏதாவது ஒரு frozen beans பயன்படுத்தலாம்.

கோதுமை மாவு போண்டா

2010-04-18T00:16:00.008-04:00

தமிழ் குடும்பம் சைட்ல பொள்ளாச்சி போண்டா பார்த்ததும்தான், அட இது நமக்கு புடிச்ச போண்டாவாச்சேன்னு ஞாபகம் வந்தது. ஆனா செய்யற விதம் கொஞ்சம் வேற மாதிரி இருக்கும். நான் சின்னதா இருக்கறப்போ வீட்டுக்கு யாராவது திடீர் விருந்தாளி வந்தால் அம்மா இதுதான் செய்வாங்க. அம்மா கோதுமை மாவுலயும் செய்வாங்க.

தேவையானவை

கோதுமை மாவு - 2 கப்

இட்லி மாவு- 2 குழி கரண்டி

வெங்காயம் - 1

பச்சை மிளகாய் - 15(அல்லது தேவைக்கேற்ப)

கறிவேப்பிலை - சிறிது

இஞ்சி - 1 துண்டு

கொத்தமல்லி தழை - சிறிது

சோடா உப்பு - 1 சிட்டிகை

உப்பு

எண்ணெய்

செய்முறை

வெங்காயம், பச்சை மிளகாய், கறிவேப்பிலை, கொத்தமல்லி, இஞ்சி அனைத்தையும் பொட்டியாக நறுக்கி வைக்கவும்.
கோதுமை மாவுடன் உப்பு, இட்லி மாவு மற்றும் நறுக்கிய பொருள்கள் சேர்த்து சிறிது நீ சேர்த்து தளர பிசையவும்.
சப்பாத்தி மாவு மாதிரி கெட்டியாவும் இருக்க கூடாது, இட்லி மாவு மாதிரியும் இருக்க கூடாது, இரண்டுக்கும் நடுவில் உள்ள பதத்திற்கு பிசையவும்.
கடாயில் எண்ணெயை காய வைத்து சிறிது சிறிதாக கிள்ளி போட்டு வேக விட்டு எடுக்கவும்.

தேங்காய் சட்னியோட சாப்பிட நல்லா இருக்கும். சும்மாவும் சாப்பிடலாம்.

இதுவே மைதா மாவிலும் செய்யலாம்.

அவகாடோ டிப் மற்றும் guacamole sandwich

2010-04-11T12:29:00.007-04:00

அவகாடோ டிப் (Guacamole)

தேவையானவை:

அவகாடோ - 2

வெங்காயம் - 1/2 (பொடியாக நறுக்கியது)

தக்காளி - 1/2 (விதை நீக்கி பொடியாக நறுக்கியது)

மல்லித்தளை - சிறிது (பொடியாக நறுக்கியது)

ஹாலப்பினோ மிளகாய் - 1 (விதை நீக்கி பொடியாக நறுக்கியது)

உப்பு

மிளகுத்தூள்

எலுமிச்சைசாறு - சிறிது

செய்முறை:

அவகாடோவை நறுக்கி கொட்டை நீக்கி, அதன் சதைப்பகுதியை வழித்தெடுத்து, அதில் எலுமிச்சை சாறு கலந்து ஒரு ஃபோர்க் கொண்டு மசிக்கவும்.
அத்துடன் வெங்காயம், மிளகாய், மல்லித்தளை, உப்பு, மிளகுத்தூள் சேர்த்து கலந்து நன்றாக மூடி ஃப்ரிஜ்ல் வைக்கவும்
பரிமாறும் போது தக்காளியை கலந்து பரிமாறவும்.

உங்களுக்கு பிடித்த சிப்ஸ் உடன் சாப்பிடலாம்.

guacamole sandwich

தேவையானவை:

ரொட்டித்துண்டுகள்

அவகாடோ டிப்

ஹம்மஸ் (இது கொண்டைக்கடலையில் செய்தது. எல்லா கடையிலும் கிடைக்கும். நிறைய veriety கிடைக்கும். நான் உபயோகித்தது Garden vegetable hommus)

செய்முறை:

ஒரு ரொட்டியின் ஒரு புறம் அவகாடோ டிப்பை தடவவும்.
இன்னொரு ரொட்டியின் ஒரு புறம் ஹம்மஸ்ஸை தடவவும்.

இரண்டையும் ஒன்றாக சேர்த்து வேண்டிய வடிவில் வெட்டி கொள்ளவும்.

இதில் வேண்டிய காய்களை வெட்டி, உப்பு, மிளகுத்தூள் சேர்த்து லேசாக வதக்கி, அதையும் வைத்து சாப்பிடலாம்.
சமைக்க நேரம்/விருப்பம் இல்லாத நாள்களில் sandwich+ fruits ஒரு நல்ல dinner. நேற்று இரவு சமைக்க விருப்பம் இல்லாததால் இதுவும் fruit salad ம் சாப்பிட்டோம்.

முளைகட்டிய கடலை புலாவ்

2010-03-28T14:35:00.007-04:00

தேவையானவை

பாஸ்மதி அரிசி - 3 கப்

முளைக்கட்டிய கொண்டைக்கடலை - 11/2 கப்

அரைக்க

இஞ்சி - 1 பெரிய துண்டு

பூண்டு - 6 பல்

சின்ன வெங்காயம் - 2

முந்திரி - 4

சோம்பு - 1 டீஸ்பூன்

பட்டை - 3 சிறிய துண்டுகள்

கிராம்பு - 2

ஏலக்காய் - 2

கசகசா - 1 டீஸ்பூன்

மிளகாய்த்தூள் - 1 டீஸ்பூன்

மல்லித்தூள் - 1 டீஸ்பூன்

தேங்காய் - 1 டேபிள்ஸ்பூன்

தாளிக்க

பிரியாணி இலை - சிறிது

கடல்பாசி - சிறிது

ரோஜா மொக்கு - சிறிது

மராட்டி மொக்கு - சிறிது

வெங்காயம் - 1 ( நீளவாக்கில் நறுக்கியது)

தக்காளி - 1 (பொடியாக நறுக்கியது)

பச்சை மிளகாய் - 3

கறிவேப்பிலை - சிறிது

புதினா - சிறிது

உப்பு

எண்ணெய்

செய்முறை

குக்கரில் எண்ணெய் விட்டு, காய்ந்ததும் தாளிக்க கொடுத்துள்ளவற்றை ஒவ்வொன்றாக சேர்த்து நன்கு வதக்கவும்.
அதில் முளை கட்டிய கடலையை சேர்த்து வதக்கி, அரைத்த விழுதை சேர்த்து நன்கு எண்ணெய் பிரிந்து வரும் வரை வதக்கவும்.
அதில் அரிசியையும் சேர்த்து , உப்பு சேர்த்து வதக்கி 6 கப் தண்ணீர் சேர்த்து குக்கரை மூடி விசில் போடவும்.
ஒரு விசில் வந்ததும், சிறுதீயில் 5 நிமிடம் வைத்து இறக்கவும்.

தயிர் பச்சடியுடன் சாப்பிட நல்லா இருக்கும். முளைகட்டிய கடலையில் புரோடின் நிறைய உள்ளதால் இது healthy புலாவ்.

சோள பணியாரம்

2010-03-18T10:11:00.007-04:00

சோளத்தில் செய்யப்படும் நிறைய உணவு வகைகள் கொங்கு பகுதியில் உண்டு. அதில் இதுவும் ஒன்று.

தேவையானவை:

சோளம் - 2 கப்

புழுங்கல் அரிசி - 1/2 கப்

உளுந்து - 2 டேபிள்ஸ்பூன்

வெந்தயம் - 1 டீஸ்பூன்

உப்பு

சின்ன வெங்காயம் - 3

சீரகம் - 1 டீஸ்பூன்

கறிவேப்பில்லை - சிறிது

செய்முறை :

சோளம், அரிசி, உளுந்து, வெந்தயம் அனைத்தையும் இரவே ஊற வைத்து மறுநாள் காலை அரைத்து, உப்பு கலந்து வைக்கவும்.
8 லிருந்து 10 மணி நேரம் புளிக்க வைக்கவும்.
சின்ன வெங்காயம், சீரகம், கறிவேப்பிலை யை அரைத்து, புளித்த மாவுடன் கலந்து வைக்கவும்.
பணியார கல்லை வைத்து பணியாரங்களாக ஊற்றி எடுக்கவும்.

சூடாக தேங்காய் சட்னி அல்லது தக்காளி சட்னியுடன் சாப்பிடலாம்.

அவகாடோ சப்பாத்தி

2010-03-05T08:17:00.004-05:00

தேவையானவை:

அவகாடோ - 1
கோதுமை மாவு - 2 கப்
எலுமிச்சை சாறு - 1 டீஸ்பூன்
உப்பு
மிளகாய்த்தூள் - 1 டீஸ்பூன்
கரம் மசலா - 1 டீஸ்பூன்

செய்முறை:

அவகாடோவை இரண்டாக வெட்டி அதன் சதைப்பகுதியை வழித்து எடுக்கவும்.
உடனே அத்துடன் எலுமிச்சை சாறு கலந்து விடவும், இல்லன்னா கறுத்துரும்.
கோதுமை மாவுடன் அவகாடோ, உப்பு, மிளகாய்த்தூள், கரம் மசாலா சேர்த்து நன்கு கலந்து, சுடு தண்ணீர் சேர்த்து நன்கு பிசையவும்.

2 அல்லது 3 மணி நேரம் கழித்து, சிறு, சிறு உருண்டைகளாக எடுத்து தேய்த்து, சப்பாத்தியாக போட்டு எடுக்கவும்.

இதில் எண்ணெய் சேர்க்க தேவையில்லை. அவகாடோவில் கொழுப்புச்சத்து அதிகம் இருப்பதால் சப்பாத்தி மிருதுவாக வரும். இதில் mono unsaturated fat அதிகம் இருப்பதால் உடம்புக்கும் நல்லது. L.D.L அளவைக் குறைக்க உதவும்.

சென்னா மசாலா

2010-02-21T10:54:00.015-05:00

ஆஸ்டின் வந்ததுக்கப்பறம் பதிவு போடவே முடியல. இடம் மாறி வந்து எல்லாம் ஒழுங்கான பிறகு computer ல வைரஸ் வந்து எல்லாம் மாத்த வேண்டியதா போச்சு. நம்ம பதிவு போடறது அதுக்கு கூட புடிக்கல போல.

இப்ப ஆஸ்டின்ல இருந்து முதல் பதிவா ஒரு accidental hit recipe. அத வெறும் சமையல் குறிப்பா எழுதறதவிட, நான் எப்படி பண்ணினேன்னு சொல்றேன்.

இரவு உணவுக்கு அவகாடோ சப்பாத்தி (அது அடுத்த பதிவு) , சென்னா மசாலான்னு முடிவு பண்ணி, காலையிலயே சென்னா ஊற வெச்சாச்சு. சாயங்காலம் பையனையும் பொண்ணையும் விளையாட கூட்டிட்டு போயிட்டதால அவசரமா சமைக்க வேண்டியதா போச்சு. அதனால எல்லாத்தையும் முன்னாலயே எடுத்து வைக்க முடியல.

சென்னாவை குக்கர்ல வச்சு 4 விசில் விட்டு எடுத்தேன். அடுத்து கடாஅயை அடுப்புல வச்சு, அது சூடாகறதுக்குள்ளே 1 வெங்காயம், 1 தக்காளி பொடியாக நறுக்கிட்டேன். கடாயில எண்ணெய் விட்டு சீரகம் தாளிச்சு விட்டு, வெங்காயம் வதக்கி, தக்காளியும் சேர்த்து வதக்கினப்புறம்தான் இஞ்சி, பூண்டு அரைக்கலயேன்னு நெனச்சேன். 4 பல் பூண்டு, 1 துண்டு இஞ்சி எடுத்து துருவி அப்படியே கடாயில சேர்த்துட்டேன்.

அது வதங்கினப்பூறம் பார்த்தா தக்காளி கம்மியா இருக்கற மாதிரி தோணிச்சு. 1 1/2 டேபிள்ஸ்பூன் தக்காளி பேஸ்ட் சேர்த்து வதக்கினேன்.

அதுல மிளகாய்த்தூள், மல்லித்தூள், கரம் மசாலா, உப்பு சேர்த்து, வேகவைத்த சென்னாவையும் சேர்த்து திருப்பியும் குக்கர்ல வச்சாச்சு.

அப்பாடா ஒரு வேலை முடிஞ்சதுன்னு சப்பாத்தி போட ஆரம்பிச்சாச்சு. 2 விசில் வரைக்கும் விட்டு குக்கரை எடுத்து பார்த்தா, அது ஒரே தண்ணியா இருந்தது. அவசரத்துல தண்ணி கொஞ்சம் அதிகமா ஊத்திட்டேன் போல.

அடுத்ததா அதை சரி பண்ண, 4 பாதாம் 4 முந்திரி அரைச்சு சேத்து, நல்லா தண்ணி வத்தற வரைக்கும் விட்டேன். கடைசியா மல்லித்தளை கொஞ்சம் நறுக்கி சேர்த்தேன்.

இவ்வளவும் சொல்லிட்டு கோவிந்தோட கமெண்ட் சொல்லலன்ன்னா நல்லா இருக்காது. "எப்படி இன்னிக்கு இவ்வளவு சூப்பரா இருக்கு சென்னா மசாலா?".

உங்களுக்காகவே கஷ்டப்பட்டு செஞ்சேன்னு சொல்ல எனக்கும் ஆசைதான். ஆனாலும் உண்மைய சொல்லிட்டேன் (இல்லேனாலும் இந்த 8 வருசத்துல நம்மள பத்தி தெரியாதா அவருக்கு).

பீர்க்கங்காய் தோல் துவையல்

2009-12-14T08:59:00.007-05:00

தேவையானவை

பீர்க்கங்காய்தோல்

வரமிளகாய் - 2

சின்ன வெங்காயம் - 3

பூண்டு - 1 பல்
தேங்காய் - 1 1/2டேபிள்ஸ்பூன்
கடலைப்பருப்பு - 1 டேபிள்ஸ்பூன்
உளுந்தம்பருப்பு - 1 டீஸ்பூன்
மல்லிவிதை - 1 டீஸ்பூன்
சீரகம் - சிறிது
புளி - சிறிது

உப்பு

செய்முறை

கடாயில் எண்ணெய் விட்டு பீர்க்கங்காய் தோலை நன்கு வதக்கி எடுக்கவும்.
வரமிளகாயை வறுத்து எடுக்கவும்.
பிறகு பூண்டு மற்றும் வெங்காயத்தை வதக்கி எடுக்கவும்.
கடலைப்பருப்பு, உளுந்தம்பருப்பு, மல்லிவிதை, சீரகம் சேர்த்து வறுத்து, அதில் தேங்காய் சேர்த்து வதக்கி எடுக்கவும்.
அனைத்தையும் சேர்த்து அத்துடன் புளி, உப்பு, தண்ணீர் சேர்த்து அரைத்து எடுக்கவும்.

இட்லி, தோசை மற்றும் சாதத்துடன் சாப்பிடலாம்.

பீர்க்கங்காய் பொரியல்

2009-12-14T08:41:00.007-05:00

தேவையானவை

பீர்க்கங்காய் - 2
வெங்காயம் - 1/2
மிளகாய்த்தூள் - 1 டீஸ்பூன்
உப்பு
கடுகு
கடலைப்பருப்பு
உளுந்தம்பருப்பு

செய்முறை

பீர்க்கங்காயை தோல் சீவி நறுக்கிக்கொள்ளவும்.
கடாயில் எண்ணெய் விட்டு கடுகு, கடலைபருப்பு, உளுந்தம்பருப்பு தாளித்து வெங்காயம் சேர்த்து வதக்கவும்.
பிறகு அதில் நறுக்கி வைத்த பீர்க்கங்காயை சேர்த்து வதக்கவும்.
உப்பு சேர்த்து சிறுதீயில் வைத்து மூடி போட்டு வேக விடவும்.
காய் வெந்ததும், மிளகாய்த்தூள் சேர்த்து வதக்கி இறக்கவும்.

இந்த பொரியல் சாதத்துல பிசைஞ்சு சாப்பிடவும் நல்லா இருக்கும்.

ரசம் (புளி சேர்க்காத ரசம்)

2009-11-25T09:59:00.005-05:00

இந்த ரசத்தை எங்க வீட்ல செலவு ரசம்னு சொல்லுவாங்க. புளி சேர்க்காம செய்யற ரசம். சளி பிடிச்சிருந்தா எங்க அம்மா இந்த ரசம் வெச்சு குடிக்க சொல்லுவாங்க. எனக்கு பிடித்த ரசம் இது.

தேவையானவை

வெங்காயம் - சிறிது பொடியாக நறுக்கியது
தக்காளி - 1 நறுக்கியது
கறிவேப்பிலை - சிறிது
கடுகு
சீரகம்
உப்பு
எண்ணெய்

வதக்கி அரைக்க

சின்ன வெங்காயம் - 4
பூண்டு - 4 பல்
வர மிளகாய் - 1
கொத்தமல்லி - 1 டேபிள்ஸ்பூன்
சீரகம் - 1 டீஸ்பூன்
மிளகு - 1 டீஸ்பூன்
கறிவேப்பிலை - சிறிது

செய்முறை

அரைக்க கொடுத்துள்ளவற்றை சிறிது எண்ணெய் விட்டு நன்கு வதக்கி தண்ணீர் சேர்த்து விழுதாக அரைக்கவும்.
கடாயில் சிறிது எண்ணெய் விட்டு கடுகு, சீரகம் தாளித்து, வெங்காயம், கறிவேப்பிலை சேர்த்து வதக்கவும்.
வெங்காயம் வதங்கியதும் அதில் தக்காளி சேர்த்து நன்கு வதக்கவும்.
பிறகு அதில் அரைத்த விழுதை சேர்த்து 3 கப் தண்ணீர், உப்பு சேர்த்து நன்கு கொதிக்க விட்டு இறக்கவும்.

இது சூப் மாதிரி குடிக்கவும் நல்லா இருக்கும். சாதத்துடனும் சாப்பிடலாம்.

இத்துடன் தூதுவளை இலை 4 அல்லது 5 சேர்த்து வதக்கி அரைத்து செய்யலாம்.

தூதுவளைப்பொடி 1 டீஸ்பூன் சேர்த்தும் செய்யலாம்.

அரைக்கும் போது கொள்ளு 1 டீஸ்பூன் சேர்த்து அரைத்தும் செய்யலாம்.

கீரை(Spinach) கடைசல்

2009-11-23T08:45:00.007-05:00

தேவையானவை

ஸ்பினாச் கீரை - 1 கட்டு

வெங்காயம் - 1/4 நறுக்கியது

பச்சை மிளகாய் - 4

பூண்டு - 2 பல் நறுக்கியது

எண்ணெய்

உப்பு

செய்முறை

கீரையை கழுவி சிறிது தண்ணீர் விட்டு மூடி போட்டு நன்கு வேக வைக்கவும். (தண்ணீர் மிகவும் குறைவாக வைக்கவும்.)
ஒரு கடாயில் சிறிது எண்ணெய் விட்டு வெங்காயம், பச்சை மிளகாய், பூண்டு சேர்த்து வதக்கவும்.
கீரையையும், வதக்கியவற்றையும் ஒன்றாக சேர்த்து மிக்ஸியில் அரைத்து எடுக்கவும். (2 அல்லது 3 சுத்து விட்டால் போதும். ரொம்ப அரைக்க வேண்டாம்).

சுடு சாதத்துடன் சேர்த்து சாப்பிட்டால் நல்லா இருக்கும். குழந்தைகளுக்கு கொடுக்க சிறிது வெண்ணெய் சேர்த்து அரைத்து கொடுக்கலாம். என் குழந்தைங்க ரெண்டு பேருக்கும் மிகவும் பிடித்தமானது இது. செய்வதற்கும் சுலபமானது.

கம்பு தோசை

2009-11-14T08:29:00.004-05:00

கம்பில் செய்யப்படும் உணவு வகைகள் கொங்கு பகுதியில் நிறைய உண்டு. இந்த தோசையும் அதில் ஒன்று. எங்க வீட்ல நான் சின்னதா இருக்கும் போது அடிக்கடி செய்வாங்க. அப்பல்லாம் எனக்கு பிடிக்காது. இப்ப அம்மாகிட்ட கேட்டு ஒவ்வொண்ணா செஞ்சுட்டிருக்கிறேன்.

தேவையானவை

கம்பு - 2 கப்
இட்லி அரிசி - 1 கப்
உளுந்தம்பருப்பு - 2 டேபிள்ஸ்பூன்
வெந்தயம் - 1 டீஸ்பூன்
சீரகம் - 1 டீஸ்பூன்
வரமிளகாய் - 2
சின்ன வெங்காயம் - 4
கறிவேப்பிலை - சிறிது
உப்பு

செய்முறை

கம்பு, அரிசி, உளுந்து, வெந்தயத்தை 4 மணி நேரம் ஊற வைக்கவும்.
நன்கு ஊறியதும், அதை கழுவி கிரைண்டரில் அரைக்கவும்.
பாதி அரையும் போது, அத்துடன், மிளகாய், வெங்காயம், சீரகம், கறிவேப்பிலை சேர்த்து நன்கு அரைத்து உப்பு கலந்து வைக்கவும்.
நன்கு புளித்ததும், மெல்லிசான தோசைகளாக ஊற்றி எடுக்கவும்.

சட்னி அல்லது சாம்பாருடன் சாப்பிடலாம். தக்காளிச்சட்னி அல்லது தேங்காய் சட்னியுடனும் நல்லா இருக்கும்.

பிடித்தது பிடிக்காதது தொடர்

2009-11-13T18:24:00.005-05:00

இதுவரைக்கும் சமையல் குறிப்பு தவிர பெருசா எதுவும் எழுதினதில்லை. இப்ப பித்தனின் வாக்கு சுதாகர் அண்ணன் இதுல இழுத்து விட்டுட்டாங்க.

1 .அரசியல் தலைவர்
பிடித்தவர் : வைக்கோ (ஜெயலலிதாவோட கூட்டு சேர்ரதுக்கு முன்னால வரைக்கும்)
பிடிக்காதவர் : கலைஞர், ஜெயலலிதா ( இப்ப இருக்கர எல்லோரும்)

2. எழுத்தாளர்

பிடித்தவர் : கல்கி, சுஜாதா, நாபா, புதுமைப்பித்தன், இந்துமதி, சிவசங்கரி
பிடிக்காதவர் : ரமணி சந்திரன்

3. பாடலாசிரியர்
பிடித்தவர் : வைரமுத்து, தாமரை, வாலி
பிடிக்காதவர் : பேரரசு

4. இயக்குனர்
பிடித்தவர் : மணி ரத்னம், சேரன்(இயக்குனராக மட்டும்), கமல்
பிடிக்காதவர் : எஸ். ஜே சூர்யா, பேரரசு

5. நடிகர்
பிடித்தவர் : பிரகாஷ்ராஜ், கமல், விக்ரம், சூர்யா.
பிடிக்காதவர் : விஜய்

6. இசையமைப்பாளர்

பிடித்தவர் : ஏ. ஆர் ரஹ்மான், இளையராஜா
பிடிக்காதவர் : தேவா

7.பேச்சாளர்

பிடித்தவர்: சாலமன் பாப்பையா
பிடிக்காதர்: விஜய டிராஜேந்தர்

8. விளையாட்டு
பிடித்தது : வாலிபால், கிரிக்கட், டென்னிஸ் (எல்லா விளையாட்டும்)
பிடிக்காதது : WWF(அது விளையாட்டுல வருமா?)

சமையல விட்டுட்டா எப்படி

8. சமையல்
பிடித்தது : எங்க அம்மா சமைக்கிற எல்லாமும்
பிடிக்காதது : அசைவ உணவுகள்

நம்ம யாரையாவது எழுத சொல்லனுமில்ல (அப்பதானே தொடர் பதிவு)

விவசாயி இளா
கீதா ஆச்சல்
ஹர்ஷினிஅம்மா

காளான் பிரியாணி

2009-11-02T08:22:00.009-05:00

தேவையானவை

பாஸ்மதி அரிசி - 3 கப்

காளான் - 2 கப்

oyster mushroom - 1 கப்

(நம்ம ஊர்ல கிடைக்கிற சிப்பிக்காளான் மாதிரி இருக்கும்)

வெங்காயம் - 2 மெலிதாக நறுக்கியது

பூண்டு - 4 பல்

பச்சை மிளகாய் - 3

கறிவேப்பிலை - சிறிது

கொத்தமல்லிதழை - சிறிது

புதினா - 1 கப்(நறுக்கியது)

எலுமிச்சை சாறு - 1 டீஸ்பூன்

அரைக்க

இஞ்சி - 10 சிறிய துண்டுகள்

பூண்டு - 10 பல்

சின்ன வெங்காயம் - 4

பட்டை - 2 துண்டு

சோம்பு - 1 டேபிள்ஸ்பூன்

ஏலக்காய் - 2

கசகசா - 1 டீஸ்பூன்

மல்லிவிதை - 2 டேபிள்ஸ்பூன்

வரமிளகாய் - 5

(சிறிது தண்ணீர் விட்டு நன்றாக அரைத்துக்கொள்ளவும்.)

தாளிக்க

பிரியாணி இலை - சிறிது

மராட்டி மொக்கு

கடல்பாசி

ரோஜா மொக்கு

பட்டை - 2 துண்டு

கிராம்பு - 2

ஜாதிக்காய் - சிறிது துறுவியது

ஏலக்காய் - 1

முந்திரி - சிறிது

செய்முறை

அரிசியை கழுவி ஊற வைக்கவும்.
குக்கரில் 4 டேபிள்ஸ்பூன் எண்ணெய் மற்றும் 2 டேபிள்ஸ்பூன் நெய் விட்டு தாளிக்க கொடுத்துள்ள பொருள்களை சேர்க்கவும்.
அதில் வெங்காயம், பச்சை மிளகாய், கறிவேப்பிலை சேர்த்து வதக்கவும்.
பிறகு அரைத்த விழுதை சேர்த்து, உப்பு சேர்த்து நன்கு என்னெய் பிரிந்து வரும்வரை வதக்கவும்.
காளானை சேர்த்து வதக்கவும்.
ஊற வைத்த அரிசியை தண்ணீர் இல்லாமல் வடித்து எடுத்து சேர்த்து நன்கு கலக்கவும்.
அதில் புதினா மற்றும் மல்லிதழை சேர்த்து கலக்கவும்.
4 கப் தண்ணீர் சேர்த்து உப்பு காரம் பார்த்து, சிறிது எலுமிச்சை சாறு சேர்த்து குக்கரை மூடிவைத்து விசில் போடவும்.

1 விசில் வந்ததும் சிறு தீயில் 5 நிமிடம் விட்டு இறக்கவும்.
தயிர் பச்சடியுடன் சாப்பிடலாம். எங்க வீட்ல அனைவருக்கும் பிடித்த உணவு இது. இதுல நீங்க காரம் இன்னும் கூட சேர்க்கலாம். கிராம்பு அரைக்க சேர்க்காம தாளிக்க சேர்க்கறதால அந்த காரம் குறையும். இது வெறும் oyster mushroom ல பண்ணினாலும் நல்லா இருக்கும்.

பாசிப்பயறும் பூசணிக்காயும்

2009-10-28T09:50:00.011-04:00

தேவையானவை

பாசிப்பயறு - 1 கப்

பூசணிக்காய் - 1 கீத்து (நறுக்கியது)

வெங்காயம் - 1 (பொடியாக நறுக்கியது)

தக்காளி - 1 (பொடியாக நறுக்கியது)

பச்சைமிளகாய் - 8 ((நீள வாக்கில் நறுக்கியது)

கறிவேப்பிலை

சீரகம் - 1 டீஸ்பூன்

மல்லி - 1 டீஸ்பூன்

கொத்தமல்லிதழை - சிறிது

உப்பு

எண்ணெய்

செய்முறை

பாசிப்பயறை குக்கரில் 4 விசில் விட்டு எடுக்கவும்.
கடாயில் எண்ணெய் விட்டு சீரகம், மல்லி தாளித்து, வெங்காயம், பச்சைமிளகாய், கறிவேப்பிலை சேர்த்து நன்கு வதக்கவும்.
அதில் பூசணிக்காயை சேர்த்து வதக்கி, பிறகு தக்காளி சேர்த்து வதக்கவும்.
சிறிது தண்ணீர் மற்றும் உப்பு சேர்த்து நன்கு வேக விடவும்.
பூசணிக்காய் வெந்ததும் வேக வைத்த பாசிப்பயறை சேர்த்து நன்கு கொதிக்க விட்டு மல்லித்தழை சேர்த்து இறக்கவும்.

சப்பாத்தி மற்றும் சாதத்துடன் சாப்பிட நல்லா இருக்கும்.

காளிஃப்ளவர் குருமா

2009-10-22T08:51:00.007-04:00

தேவையானவை

காளிஃப்ளவர் - 1 (சிறிய பூக்களாக நறுக்கவும்)

வெங்காயம் - 1/2 (நறுக்கியது)

தக்காளி - 1/2 (நறுக்கியது)(optional)

கறிவேப்பிலை

கடுகு

உப்பு

எண்ணெய்

அரைக்க

தேங்காய் - 2 டேபிள்ஸ்பூன்

பாதாம் - 10
வறுகடலை - 1 டேபிள்ஸ்பூன்

பச்சை மிளகாய் - 6

பூண்டு - 4 பல்

சோம்பு - 1 டீஸ்பூன்

பட்டை - 1 துண்டு

கசகசா - 1 டீஸ்பூன்

(நன்கு அரைத்துக்கொள்ளவும்)

செய்முறை

கடாயில் எண்ணெய் விட்டு கடுகு தாளித்து வெங்காயம் சேர்த்து வதக்கவும்.
வெங்காயம் வதங்கியதும் அதில் தக்காளி சேர்த்து வதக்கி, காளிஃப்ளவரை சேர்த்து தண்ணீர் சேர்த்து கொதிக்க விடவும்.
காளிஃப்ளவர் வெந்ததும், அரைத்த விழுதை சேர்த்து 1/2 கப் தண்ணீர், உப்பு சேர்த்து நன்கு கொதிக்க விட்டு இறக்கவும்.

இட்லி, சப்பாத்தி, தோசை மற்றும் உப்புமாவுக்கும் நல்ல combination. இது வெள்ளைக் குருமான்னும் சொல்லுவாங்க. காய் எதுவும் இல்லேன்னா கூட வெறும் வெங்காயம் தக்காளில செஞ்சாலும் நல்லா இருக்கும்.

கீரை பொரியல்

2009-10-20T10:52:00.006-04:00

தேவையானவை

கீரை - 1 கட்டு

வெங்காயம் - 1/4 (பொடியாக நறுக்கியது)

தேங்காய்த்துருவல் - 1 டேபிள்ஸ்பூன்

மிளகாய்த்தூள் - 1 டீஸ்பூன்

கடுகு

கறிவேப்பிலை

கடலைப்பருப்பு - சிறிது

உளுந்தம்பருப்பு - சிறிது

செய்முறை

கீரையை கழுவி பொடியாக நறுக்கி வைக்கவும்.
கடாயில் எண்ணெய் விட்டு காய்ந்ததும், கடுகு, கடலைப்பருப்பு, உளுந்தம்பருப்பு தாளிக்கவும்.
வெங்காயம், கறிவேப்பிலை சேர்த்து நன்கு வதக்கவும்.
பிறகு கீரையை சேர்த்து நன்கு வதக்கி, உப்பு, மிளகாய்த்தூள் சேர்த்து சிறு தீயில் கடாயை மூடி வைத்து வேக விடவும்.
நன்கு வெந்தவுடன், மூடியை எடுத்து விட்டு தண்ணீர் வற்றும் வரை கிளறி விட்டு, தேங்காய்த்துருவல் சேர்த்து கலந்து இறக்கவும்.

தயிர் சாதத்துடன் சாப்பிடலாம். இது Amarnath leaves . இந்த கீரைக்கு தமிழ்ழ என்ன பேர்னு தெரியாது. நம்ம ஊர் தண்டங்கீரை மாதிரியே இருக்கும்.

மைசூர்பாக்

2009-10-16T09:15:00.008-04:00

இதுக்கு ஏன் இந்த பேர்னு தெரியல. ஒரு வேளை மைசூர்லதான் மொதல்ல செஞ்சிருப்பாங்களோ? :-).

தேவையானவை

கடலைமாவு - 2 கப்
சர்க்கரை - 3 கப்
எண்ணெய் - 3 கப்
நெய் - 1 கப்

செய்முறை

ஒரு நான் ஸ்டிக் கடாயில் (செய்யறதுக்கு ஈசி) சர்க்கரை போட்டு, அதில் 1 கப் தண்ணீர் சேர்த்து நன்கு கொதிக்கவிடவும்.
அது கொதிக்கும் நேரத்தில் கடலை மாவில் எண்ணெய் விட்டு கரைத்து வைக்கவும்.
சர்க்கரை பாகு ஒரு கம்பிப்பாகு பதம் வந்ததும் கரைத்து வைத்த மாவை சேர்த்து நன்கு கிளறவும். (பக்கத்தில் கணவர் இருந்தால் வசதி :-) )
சிறிது சிறிதாக எண்ணெய் மற்றும் நெய் சேர்த்து கிளறவும்.
சிறிது நேரத்தில் எண்ணெய் கக்க ஆரம்பிக்கும். அப்போது எண்ணெய் சேர்ப்பதை நிறுத்தி விடலாம்.

கிளறும் போதே நன்கு பொற பொறவென பொங்கி வரும் போது எடுத்து நெய் தடவிய தட்டில் கொட்டி ஆற விடவும்.
ஓரளவு ஆறியதும் வேண்டிய வடிவத்தில் கட் பண்ணிக்கொள்ளவும்.

கடலை மாவைக்கரைத்து செய்வதால், கட்டி தட்டாமல் வரும்.இது கிருஷ்ணா ஸ்வீட்ஸ் மைசூர்பாக் போலவே இருக்கும்.
Thanks to Govind அவருதான் கிளறினாரு.

அனைவருக்கும் இனிய தீபத்திருநாள் நல்வாழ்த்துக்கள்.

முறுக்கு

2009-10-15T20:45:00.004-04:00

தேவையானவை

புழுங்கல் அரிசி - 4 கப்
பொட்டுகடலை மாவு - 3/4 கப்
கடலை மாவு - 1/4 கப்
உளுந்து மாவு - 1 டேபிள்ஸ்பூன்
வரமிளகாய் - 6
பூண்டு -10 பல்
கறிவேப்பிலை - சிறிது
சீரகம் - 1 டீஸ்பூன்
ஓமம் - 1 டீஸ்பூன்
வெண்ணெய் - 1 டேபிள்ஸ்பூன்
உப்பு
எண்ணெய்

செய்முறை

அரிசியை 3 மணி நேரம் ஊற வைத்து அத்துடன் வரமிளகாய், பூண்டு, கறிவேப்பிலை, சீரகம் சேர்த்து நன்கு கெட்டியாக அரைக்கவும்.
அத்துடன் கடலை மாவு, பொட்டுக்கடலை மாவு, உப்பு, வெண்ணெய் ஓமம் சேர்த்து நன்கு கலக்கவும்.
மாவை முறுக்கு அச்சில் போட்டு சிறு சிறு தட்டுகளில் பிழிந்து வைக்கவும்.
எண்ணெயை காய வைத்து பிழிந்து வைத்த முறுக்குகளை போட்டு பொரித்து எடுக்கவும்.
எல்லா மாவையும் இதேபோல் பிழிந்து பொரித்தெடுக்கவும்.

பருப்பு சாதம் (தட்டைப்பருப்பு)

2009-10-15T08:28:00.005-04:00

தேவையானவை

அரிசி(சோனா மசூரி) - 2 கப்
தட்டைப்பருப்பு(காராமணி உடைத்தது) - 1/2 கப்
வெங்காயம் - 1 (நறுக்கியது)
தக்காளி - 1 (நறுக்கியது)
பச்சை மிளகாய் - 3
வர மிளகாய் - 4
கறிவேப்பிலை - சிறிது
பூண்டு - 4 பல் (பொடியாக நறுக்கியது)
சீரகம் - 1 டீஸ்பூன்
கடுகு - 1 டீஸ்பூன்
உப்பு
எண்ணெய்

செய்முறை

அரிசி, பருப்பை கழுவி ஊற வைக்கவும்.
குக்கரில் எண்ணெய் விட்டு கடுகு, சீரகம் தாளித்து பூண்டு சேர்த்து வதக்கவும்.
பிறகு அதில் வெங்காயம், பச்சை மிளகாய், வரமிளகாய், கறிவேப்பிலை சேர்த்து நன்கு வதக்கவும்.
தக்காளி, உப்பு சேர்த்து வதக்கவும்.
நன்கு வதங்கியதும், அரிசி பருப்பு சேர்த்து கலந்து, 5 கப் தண்ணீர் சேர்த்து குக்கரை மூடி வைக்கவும்.
ஒரு விசில் வந்ததும், சிறு தீயில் 5 நிமிடம் வைத்து இறக்கவும்.

இது கொங்கு நாட்டு பகுதியில் அதிகம் செய்யப்படும் உணவு. புளிக்குழம்புடன் சாப்பிட நல்லா இருக்கும்.ஊறுகாயுடனும் சாப்பிடலாம். வேலை நிறைய(தீபாவளி பலகாரம் செய்யறது) இருக்கறப்போ சீக்கிரமா சாப்பாடு செய்யனும்னா இந்த மாதிரி பருப்பு சாதம் வகைகள் எளிதாக செய்து விடலாம்.

சாம்பார் சாதம் (பிஸிபேளாபாத்)

2009-10-13T10:22:00.010-04:00

தேவையானவை

அரிசி - 1 கப்

துவரம் பருப்பு - 1 கப்

புளித்தண்ணீர் - 1 கப்

எண்ணெய்
உப்பு

முருங்கைக்காய்

சின்ன வெங்காயம்

அவரைக்காய்

உருளைகிழங்கு

கேரட்

பீன்ஸ்

பட்டாணி

கத்தரிக்காய்

காளிஃப்ளவர்

சவ்சவ்

வாழைக்காய்

(அனைத்தும் சேர்ந்து 3 கப்)

தாளிக்க

வெங்காயம் - 1 (நீளவாக்கில் மெல்லியதாக நறுக்கியது)

கடுகு

பெருங்காயம்

கறிவேப்பிலை

நெய் - 1 டீஸ்பூன்

வறுத்து பொடிக்க

வரமிளகாய் - 14

மல்லி விதை - 1 டேபிள் ஸ்பூன்

கடலைப்பருப்பு - 1 டேபிள் ஸ்பூன்

சீரகம் - 1 டீஸ்பூன்

வெந்தயம் - 1 டீஸ்பூன்

மிளகு - 1 டீஸ்பூன்

சோம்பு - 1 டீஸ்பூன்

பட்டை - 2 துண்டுகள்

ஏலக்காய் - 1

கறிவேப்பிலை

(1/2 டீஸ்பூன் நெய் விட்டு வறுத்து பொடிக்கவும்)

செய்முறை

அரிசி மற்றும் பருப்பை கழுவி ஊற வைக்கவும்.
குக்கரில் சிறிது எண்ணெய் விட்டு காய்கள் அனைத்தையும் சேர்த்து பொடித்து வைத்துள்ள பொடியையும் சேர்த்து கலக்கவும்.
அதில் அரிசி மற்றும் பருப்பை சேர்த்து கலந்து, புளித்தண்ணீர் மற்றும் 10 கப் தண்ணீர் சேர்த்து, உப்பும் சேர்த்து கலந்து மூடி வைத்து 6 விசில் வரை விடவும்.
கடாயில் நெய் மற்றும் சிறிது எண்ணெய் சேர்த்து கடுகு, பெருங்காயம் தாளித்து, வெங்காயம், கறிவேப்பிலை சேர்த்து நன்கு வதக்கவும்.
வெங்காயம் வதங்கியதும், குக்கரில் உள்ள சாதத்துடன் கலந்து, மல்லித்தழை தூவி வைக்கவும்.

அப்பளம் அல்லது சிப்ஸ் நல்ல combination.

இது செய்வதற்கு சுலபமானது. சுவையும் நன்றாக இருக்கும்.

சாதத்துக்கு சேர்ப்பதைப்போல தண்ணீர் இரண்டு மடங்கு சேர்க்க வேண்டும்.எல்லா காய்களும் சேர்க்கலாம்.

பலாப்பழ ஹல்வா

2009-10-10T21:06:00.007-04:00

தேவையானவை

பலாச்சுளை - 20

சர்க்கரை - 1 கப்

நெய் - 3 டேபிள்ஸ்பூன்

முந்திரி - 10

செய்முறை

பலாச்சுளைகளை மிக்சியில் போட்டு நீர் சேர்க்காமல் அரைத்து எடுக்கவும்.
நான் ஸ்டிக் கடாயில் நெய் விட்டு முந்திரியை வறுத்து எடுக்கவும்.
அதே கடாயில் பழக்கூழை சேர்த்து நன்கு வதக்கவும்.
அத்துடன் சர்க்கரை சேர்த்து நன்கு கிளறவும்.(அரைத்த பழக்கூழ் 1 1/2 கப்புக்கு 1 கப் சர்க்கரை சேர்க்கவேண்டும்)
கடைசியில் வறுத்து வைத்த முந்திரி கலக்கவும்.

செய்வதற்கும் எளிது. சுவையாகவும் இருக்கும். இது டின் பலாப்பழத்தில் செய்தது.

பூசணி ஹல்வா

2009-10-05T08:48:00.009-04:00

தேவையானவை

பூசணிக்காய் -1 கீத்து

சர்க்கரை - 3/4 கப்

ஏலக்காய் தூள் - சிறிது

முந்திரி, காய்ந்த திராட்ஷை - 10

நெய் - 2 டேபிள்ஸ்பூன்

செய்முறை

பூசணிகாயை தோல் சீவி, நடுவில் உள்ள விதைப்பகுதியையும் எடுத்துவிட்டு துருவி வைக்கவும்.
அதை குக்கரில் வைத்து 2 விசில் விட்டு எடுக்கவும்.
ஆறியவுடன் பூசணியைப்பிழிந்து தண்ணீர் தனியாகவும், பூசணித்துருவல் தனியாகவும் எடுக்கவும்.
முந்திரி, திராட்ஷையை நெய்யில் வறுத்து வைக்கவும்.
இப்போது பூசணித்துருவல் அளவிற்கு சர்க்கரை எடுத்து,(3/4 கப் பூசணித்துருவல் அதனால் 3/4 கப் சர்க்கரை) பிழிந்து வைத்த தண்ணீரில் கலந்து கொதிக்கவிடவும்.
நன்கு கொதித்ததும், பூசணித்துருவலை கலந்து வேக விடவும்.
கொஞ்சம் நெய்சேர்த்து, ஏலக்காய் தூளையும் சேர்த்து கிளறவும்.
அல்வா பதம் வந்ததும், நெய்யில் வறுத்த முந்திரி, திராட்ஷை சேர்த்து கிளறி இறக்கவும்.

வெண்டைக்காய் புளி குழம்பு

2009-10-02T14:07:00.005-04:00

தேவையானவை

வெண்டைக்காய் - 1/4 கிலோ
வெங்காயம் - 1/2
கறிவேப்பிலை
பூண்டு - 5 பல்
மஞ்சள்தூள் - 1/2 டீஸ்பூன்
மிளகாய்த்தூள் - 1 டீஸ்பூன்
புளித்தண்ணீர் - 1/4 கப்
உப்பு
பெருங்காயத்தூள் - சிறிது
தேங்காய்ப்பால் -1/4 கப்
கடுகு
வெந்தயம்
உப்பு
எண்ணெய்

செய்முறை

வெண்டைக்காயை வட்ட வட்டமாக நறுக்கி, கடாயில் சிறிது எண்ணெய் விட்டு , சிறு தீயில் நன்கு வதக்கி எடுக்கவும்.
கடாயில் மேலும் சிறிது எண்ணெய் விட்டு, கடுகு, வெந்தயம், பெருங்காயத்தூள் தாளித்து, வெங்காயம், பூண்டு கறிவேப்பிலை சேர்த்து வதக்கவும்.
அதில் வதக்கி வைத்த வெண்டைக்காய் சேர்த்து, மஞ்சள்தூள், மிளகாய்த்தூள் , புளித்தண்ணீர், உப்பு சேர்த்து நன்கு கலந்து கொதிக்கவிடவும்.
நன்கு கொதித்ததும், தேங்காய்ப்பால் சேர்த்து மீண்டும் கொதிக்க விடவும்.
நன்கு சுண்டியதும் இறக்கிவிடவும்.

பருப்பு சாதம், அல்லது வெறும் சாதத்துடன் சாப்பிடலாம்.

காய்கறி ரவா கிச்சடி

2009-10-02T10:43:00.010-04:00

தேவையானவை

ரவை - 1 1/2 கப்

வெங்காயம் - 1/2

தக்காளி - 1/2

பச்சை மிளகாய் - 4

கறிவேப்பிலை -சிறிது

புதினா - 1/4 கப்

கேரட் - 1

உருளைகிழங்கு - 1

காளிஃப்ளவர் - 1/2 கப் (பொடியாக நறுக்கியது)

பட்டாணி - 1/2 கப்

(காய்களை சிறியதாக நறுக்கி வைக்கவும்)

அரைக்க

இஞ்சி - சிறிய துண்டு

பூண்டு - 3 பல்

சோம்பு - 1/2 டீஸ்பூன்

கிராம்பு - 1

பட்டை - 1

தாளிக்க

கடுகு

கடலைப்பருப்பு

உளுந்தம்பருப்பு

பிரியாணி இலை - சிறிது

கடல் பாசி - சிறிது

செய்முறை

கடாயில் சிறிது எண்ணெய் விட்டு ரவையை நன்கு வறுத்து எடுக்கவும்.
அதே கடாயில் சிறிது எண்ணெய் விட்டு காய்ந்ததும் தாளிக்க கொடுத்துள்ளவற்றை ஒவ்வொன்றாக போடவும்.
பிறகு அதில் வெங்காயம், மிளகாய் கறிவேப்பிலை சேர்த்து வதக்கவும்.
தக்காளி சேர்த்து வதக்கவும்.
பிறகு அத்துடன் அரைத்த விழுதை சேர்த்து பச்சை வாசனை போகும்வரை வதக்கவும்.
அதில் காய்கள், மஞ்சள்தூள் மற்றும் புதினா சேர்த்து வதக்கி 4 கப் தண்ணீர், மற்றும் உப்பு சேர்த்து கொதிக்கவிடவும்.
நன்கு கொதித்ததும், ரவையை சிறிது சிறிதாக சேர்த்து கட்டி தட்டாமல் கிளறி விடவும்.
மூடி போட்டு சிறுதீயில் வைத்து 5 நிமிடம் வரை புளுங்க விடவும்.

எண்ணெய் கொஞ்சம் அதிகமாக சேர்த்தால் நல்லா இருக்கும்.

நெய் மற்றும் முந்திரி சேர்த்தால் ரிச்சாக இருக்கும்.

இதில் மசாலா பொருள்கள் சேர்க்காமலும் செய்யலாம். ஆனா என் பையனுக்கு பிரியாணி வகை உணவுகள் பிடிக்கும்கறதால நான் முடிஞ்ச வரைக்கும் மசாலா சேர்த்துருவேன்.

முளைப்பயிறு சுரைக்காய் கறி

2009-09-30T17:20:00.010-04:00

தேவையானவை

முளைப்பயிறு - 2 கப்

(பாசிபயறும், தட்டைப்பயறும் கலந்து முளைக்கட்டியது)

சுரைக்காய் - 2 கப்

(சிறியதாக நறுக்கியது)

வெங்காயம் - 1/2 (பொடியாக நறுக்கியது)

தக்காளி - 1/2 (பொடியாக நறுக்கியது)

கறிவேப்பிலை - சிறிது

மிளகாய்த்தூள் - 1 டீஸ்பூன்

சாம்பார்த்தூள் - 1 டீஸ்பூன்

உப்பு

எண்ணெய்

கடுகு - சிறிது

செய்முறை

ஒரு கடாயில் எண்ணெய் விட்டு கடுகு தாளித்து, வெங்காயம், கறிவேப்பிலை சேர்த்து நன்கு வதக்கவும்.
வெங்காயம் நிறம் மாறியதும், தக்காளி சேர்த்து வதக்கவும்.
பிறகு சுரைக்காயை சேர்த்து நன்கு வதக்கவும்.
இதில் முளைப்பயிறு சேர்த்து, மிளகாய்த்தூள், சாம்பார்த்தூள், உப்பு சேர்த்து வதக்கி 1 கப் தண்ணீர் விட்டு நன்கு கொதிக்க விடவும்.
முளைப்பயிறு சீக்கிரம் வெந்து விடும். வேகவில்லை என்றால் இன்னும் சிறிது தண்ணீர் சேர்த்து வேக வைக்கவும்.
தண்ணீர் சுண்டியதும் இறக்கவும்.

சத்தான, சுவையான கறி இது. சாதம் மற்றும் சப்பாத்தி இரண்டுக்கும் நன்றாக இருக்கும்.

பனீர் கபாப் (Paneer kabab)

2009-09-30T08:41:00.007-04:00

தேவையானவை

பனீர் - 20 துண்டுகள்

குடமிளகாய் பச்சை - 20 துண்டுகள்

குடமிளகாய் சிவப்பு - 20 துண்டுகள்

காளான் - 20 துண்டுகள்

வெங்காயம் - 20 துண்டுகள்

(ஒரே மாதிரி சதுரமாக வெட்டி வைக்கவும்)

மசாலாவுக்கு

இஞ்சி பூண்டு விழுது - 1 டேபிள் ஸ்பூன்

மிளகாய்த்தூள் - 1 டீஸ்பூன்

மல்லித்தூள் - 1 டீஸ்பூன்

கரம் மசாலாத்தூள் - 1 டீஸ்பூன்

உப்பு - 1/2 டீஸ்பூன்

சோள மாவு - 1 டீஸ்பூன்

எலுமிச்சை சாறு - 1 டீஸ்பூன்

தயிர் - 1 டேபிள் ஸ்பூன்

(நன்கு கலந்து வைக்கவும்)

செய்முறை

மசாலாவையும், வெட்டி வைத்த காய் மற்றும் பனீரையும் சேர்த்து நன்கு கலந்து 3 மணி நேரம் fridge ல் வைக்கவும்.
ஒவனை 375 க்கு முற்சூடு படுத்தவும்.
காய்களை ஒவ்வொன்றாக எடுத்து skewer ல்(தமிழ்ல என்னன்னு சொல்லுங்கப்பா) குத்தி வைக்கவும். 10 துண்டுகள் வரை ஒரு skewer ல் வைக்கலாம்.
ஒவனில் வைத்து 20 - 25 நிமிடங்கள் வரை விட்டு எடுக்கவும்.

எண்ணெயே சேர்க்காத ஹெல்த்தி, சுலபமான மற்றும் சுவையான கபாப் ரெடி.

காய்கறி குருமா ( Vegetable Korma)

2009-09-14T20:23:00.007-04:00

தேவையானவை:

கேரட் - 2

உருளைக்கிழங்கு - 2

பட்டாணி - 1/4 கப்

பச்சை கொண்டைக்கடலை - 1/4 கப்

காளிஃப்ளவர் - 1/4 கப்

(பொடியாக நறுக்கி வைக்கவும்)

வெங்காயம் - 1 (பொடியாக நறுக்கியது)

தக்காளி - 1/2

இஞ்சி பூண்டு விழுது

கறிவேப்பிலை - சிறிது

மஞ்சள்தூள் - 1 டீஸ்பூன்

மிளகாய்த்தூள் - 1 டீஸ்பூன்

கரம் மசாலாத்தூள் - 1 டீஸ்பூன்

உப்பு

எண்ணெய்

தாளிக்க:

கடுகு

கிராம்பு - 2

ஏலக்காய் -1

கடல்பாசி - சிறிது

மராட்டி மொக்கு - 2

பிரியாணி இலை - 2

அரைக்க:

தேங்காய் - 2 டேபிள்ஸ்பூன்

முந்திரி - 4

பாதாம் - 4

மல்லி விதை - 1 டீஸ்பூன்

சீரகம் - 1 டீஸ்பூன்

சோம்பு - 1 டீஸ்பூன்

கசகசா - 1 டேபிள்ஸ்பூன்

கடலை - 1 டேபிள்ஸ்பூன்
பச்சைமிளகாய் - 2

கடல்பாசி - சிறிது

செய்முறை:

கடாயில் சிறிது எண்ணெய் விட்டு தாளிக்க கொடுத்துள்ளவற்றை ஒவ்வொன்றாக சேர்க்கவும்.
அதில் வெங்காயம், கறிவேப்பிலை சேர்த்து நிறம் மாறும் வரை வதக்கவும்.
இஞ்சி பூண்டு விழுது சேர்த்து பச்சை வாசம் போகும் வரை வதக்கவும்.
அதில் நறுக்கி வைத்துள்ள காய்கள், தக்காளி மஞ்சள்தூள், மிளகாய்த்தூள், கரம்மாசாலாத்தூள், உப்பு சேர்த்து, காய்கள் வேகும் வரை கொதிக்கவிடவும்.
பிறகு அரைத்த மசாலாவை சேர்த்து நன்கு கொதிக்கவிட்டு இறக்கவும்.
மல்லித்தளை தூவி வைக்கவும்.

சப்பாத்தி , பரோட்டா, பூரி , தோசை அனைத்திற்கும் நல்லா இருக்கும்.

முளைப்பயிறு(பாசிப்பயறு) பிரியாணி

2009-09-03T13:56:00.006-04:00

தேவையானவை:

பாஸ்மதி அரிசி - 2 கப்

முளைப்பயிறு - 2 கப்

வெங்காயம் - 1(நறுக்கியது)

பச்சை மிளகாய் - 6 (அல்லது காரத்திற்கு ஏற்ப)

தக்காளி - 1/2 (நறுக்கியது)

இஞ்சி பூண்டு விழுது - 1 டேபிள்ஸ்பூன்

உப்பு

எண்ணெய்

நெய் - 1 டீஸ்பூன்

தாளிக்க:

பிரியாணி இலை - சிறிது

சோம்பு - 1 டீஸ்பூன்

பட்டை - 2 துண்டு

ஏலக்காய் - 1

கிராம்பு - 1

மராட்டி மொக்கு - 3

கடல்பாசி - சிறிது

ரோஜா மொக்கு - சிறிது

செய்முறை:

குக்கரில் 2 டேபிள்ஸ்பூன் எண்ணெய் + 1 டீஸ்பூன் நெய் விட்டு தாளிக்கும் பொருட்களை சேர்க்கவும்.
அதில் வெங்காயம், பச்சை மிளகாய், கறிவேப்பிலை சேர்த்து வதக்கவும்.
தக்காளி சேர்த்து வதக்கி, இஞ்சி பூண்டு விழுது சேர்த்து பச்சை வாசம் போக நன்கு வதக்கவும்.
இதில் முளைப்பயிறு, பாஸ்மதி அரிசி சேர்த்து வதக்கி , உப்பும் சேர்த்து கலந்து 3 கப் தண்ணீர் சேர்த்து மூடி வைத்து விசில் போடவும்.
1 விசில் வந்த்ததும், தீயைக்குறைத்து 5 நிமிடம் விட்டு இறக்கவும்.

தயிர் பச்சடியுடன் சாப்பிடலாம். புரோட்டீன் சத்து நிறைந்த உணவு. brown basmathi அரிசியும் உபயோகிக்கலாம்.

சோயா மசாலா

2009-09-01T09:10:00.006-04:00

தேவையானவை:

சோயா உருண்டைகள் - 50
வெங்காயம் - 1(பொடியாக நறுக்கியது)

தக்காளி - 1 ( பொடியாக நறுக்கியது)

கறிவேப்பிலை - சிறிது

மஞ்சள்தூள் - 1 டீஸ்பூன்

மிளகாய்த்தூள் - 1 - 2 டீஸ்பூன்

மல்லித்தூள் - 1 டேபிள்ஸ்பூன்

கரம் மசாலா தூள் - 1 டீஸ்பூன்

இஞ்சி, பூண்டு விழுது - 1 டேபிள்ஸ்பூன்

உப்பு
எண்ணெய்

தாளிக்க:

பட்டை - 2 சிறிய துண்டுகள்

கிராம்பு - 1

ஏலக்காய் - 1

சோம்பு - 1 டீஸ்பூன்

கடுகு

பிரியாணி இலை சிறிது

செய்முறை:

சோயா உருண்டைகளை கொதிக்கும் நீரில் போட்டு சிறிது நேரம் கொதிக்கவிட்டு பிழிந்து எடுக்கவும்.
குக்கரில் எண்ணெய் விட்டு தாளிக்க கொடுத்துள்ளவற்றை சேர்த்து, அத்துடன் வெங்காயம் கறிவேப்பிலை சேர்த்து நன்கு வதக்கவும்.
பிறகு தக்காளி சேர்த்து உப்பு சிறிது சேர்த்து வதக்கவும்.
அதில் இஞ்சி பூண்டு விழுது சேர்த்து வாசனை போகும் வரை வதக்கவும்.
மிளகாய்த்தூள், மஞ்சள்தூள், மல்லித்தூள், கரம் மசாலா, உப்பு சேர்த்து சோயா உருண்டை+ 1/2 கப் தண்ணீர் சேர்த்து நன்கு கலந்து குக்கரை மூடி வைத்து 2 விசில் வந்ததும் இறக்கவும்.

மல்லித்தளை சேர்க்கவும்.

சப்பாத்தி, பூரி, புலாவ் உடன் சாப்பிடலாம்.சோயா புரோடீன் சத்து நிறைந்தது. டயட்டில் இருப்பவர்களும் சேர்த்து கொள்ளலாம். செய்வதும் சுலபம்.
நேத்து dinner சப்பாத்தி, சோயா மசாலா.

Easy கத்தரிக்காய் சட்னி

2009-08-30T13:03:00.007-04:00

தேவையானவை:

வெங்காயம் - 1/2

தக்காளி - 1

கத்தரிக்காய் - 5

(பொடியாக நறுக்கவும்)

வர மிளகாய் - 2

கறிவேப்பிலை

எண்ணெய்

உப்பு

செய்முறை:

கடாயில் எண்ணெய் விட்டு வரமிளகாயை வறுத்து எடுக்கவும்.

அதே எண்ணெயில் வெங்காயம், கறிவேப்பிலை சேர்த்து நிறம் மாறும் வரை வதக்கவும்.

பிறகு கத்தரிக்காயை சேர்த்து உப்பு சேர்த்து நன்கு வதக்கவும்.

அதில் தக்காளி சேர்த்து வதக்கி, சிறிது தண்ணீர் சேர்த்து நன்கு வேகவிட்டு இறக்கவும்.
நன்றாக ஆறியதும் அரைத்து எடுத்து வைக்கவும்.

இட்லி, தோசை, பொங்கல் அனைத்துக்கும் நல்லா இருக்கும்.

கிழங்கு தோசை கத்தரிக்காய் சட்னி.

காய்கறி அவல் உப்புமா(Vegetable poha uppuma)

2009-08-29T14:25:00.009-04:00

தேவையானவை:

அவல் - 2 கப்
வெங்காயம் - 1/2
பச்சை மிளகாய் - 5
இஞ்சி - 1 சிறிய துண்டு பொடியாக நறுக்கியது
தக்காளி - 1/2
கேரட் - 1
முட்டைகோஸ் - 1/4
குடமிளகாய் பச்சை- 1/2
குடமிளகாய் ஆரஞ்ச் - 1/2
(பொடியாக நறுக்கவும்)
கறிவேப்பிலை
மஞ்சள்தூள் - 1 டீஸ்பூன்
உப்பு
எண்ணெய்
கடுகு
கடலைப்பருப்பு - 1 டீஸ்பூன்
உளுந்தம்பருப்பு - 1 டீஸ்பூன்

செய்முறை:

அவலை தண்ணீரில் நனைத்து பிழிந்து எடுக்கவும்.

கடாயில் எண்ணெய் விட்டு கடுகு, கடலைப்பருப்பு, உளுந்தம்பருப்பு தாளித்து வெங்காயம், மிளகாய், இஞ்சி சேர்த்து வதக்கவும்.

அதில் காய்கறிகளை சேர்த்து , உப்பும் சேர்த்து நன்கு வதக்கவும்.

பிறகு தக்காளி சேர்த்து வதக்கி , மஞ்சள்தூள் சேர்க்கவும்.

அதில் அவலை சேர்த்து நன்கு கலந்து சூடானதும் இறக்கவும்.

மாங்காய் ஊறுகாய் நல்ல combination

குடமிளகாய் ஸ்டிர் ஃப்ரை(Capsicam stir fry)

2009-08-27T18:36:00.007-04:00

தேவையானவை:

குடமிளகாய் (பச்சை) - 1/2
குடமிளகாய்(ஆரஞ்சு) -1/2
இத்தாலியன் பெப்பர் - 1
வெங்காயம் - 1
(நீளவாக்கில் மெல்லியதாக நறுக்கவும்)
தக்காளி - 1/2 (பொடியாக நறுக்கவும்)
கறிவேப்பிலை
சோம்பு - 1 டீஸ்பூன்
பட்டை - 1 துண்டு
கடுகு - 1 டீஸ்பூன்
உப்பு

செய்முறை:

கடாயில் எண்ணெய் விட்டு கடுகு, பட்டை, சோம்பு தாளித்து வெங்காயம், கறிவேப்பிலை சேர்த்து வதக்கவும்.

நன்கு வதங்கியதும், அதில் நறுக்கி வைத்த மிளகாய்களையும், உப்பும் சேர்த்து நன்கு வதக்கவும்.

பிறகு தக்காளி சேர்த்து வதக்கி, மிளகாய்த்தூள் சேர்த்து கலக்கி இறக்கவும்.

சப்பாத்தியில் ரோல் பண்ணி சாப்பிடலாம்.

அல்லது தயிர் சாதத்துடன் சாப்பிடலாம்.

ஸ்விஸ் சார்டு(Swiss chard) பருப்பு

2009-08-23T12:27:00.005-04:00

தேவையானவை

ஸ்விஸ் சார்டு(Swiss chard) - 1 கட்டு

துவரம் பருப்பு - 1/2 கப்

பூண்டு - 2 பல்

வெங்காயம் - 1/2 (பொடியாக நறுக்கியது)

தக்காளி - 1/2 (பொடியாக நறுக்கியது)

மிளகாய்த்தூள் - 1 டீஸ்பூன்

உப்பு

கடுகு

எண்ணெய்

செய்முறை

பருப்புடன் பூண்டு சேர்த்து குக்கரில் 3 விசில் விட்டு இறக்கவும்.
ஸ்விஸ் சார்டை சுத்தம் செய்து பொடியாக நறுக்கி வைக்கவும்.
கடாயில் சிறிது எண்ணெய் விட்டு கடுகு தாளித்து, வெங்காயம் சேர்த்துவதக்கவும்.
அதில் ஸ்விஸ் சார்டை சேர்த்து நன்கு வதக்கவும்.
வதங்கியதும், தக்காளி சேர்த்து வதக்கி உப்பு மற்றும் மிளகாய்த்தூள் சேர்க்கவும்.
பிறகு அதில் வேக வைத்த பருப்பை சேர்த்து ஒரு கொதி விட்டு இறக்கவும்.

சுவையான ஸ்விஸ் சார்டு(Swiss chard) பருப்பு ரெடி. சூடான சாதத்துடன் (நெய்யும்) சேர்த்து சாப்பிடலாம்

இன்று மதிய உணவு, சாதம், ஸ்விஸ் சார்டு(Swiss chard) பருப்பு மற்றும் புரோக்கலி பொறியல்.

கோதுமைப்பாயசம்(Wheet Payasam)

2009-08-22T11:47:00.005-04:00

தேவையானவை :

உடைத்த கோதுமை(Cracked Wheet) - 1 கப்

பால் - 4 கப்

வெல்லம் - 2 கப்(6 அல்லது 7 அச்சு வெல்லம்)

முந்திரி & உலர்ந்த திராட்ஷை

நெய்

செய்முறை

கோதுமையுடன் 4 கப் தண்ணீர் சேர்த்து குக்கரில் 2 விசில் விட்டு இறக்கவும்.

அத்துடன் பால் சேர்த்து நன்கு கொதிக்க விடவும்.

4 கப் பால் 2 கப்பாக குறையும் வரை சிறு தீயில் கொதிக்க விடவும்.

கடாயில் நெய் விட்டு முந்திரி , உலர்ந்த திராட்ஷை சேர்த்து வறுத்து எடுக்கவும்.

கொதிக்கும் கோதுமையில் வெல்லம் மற்றும் வறுத்த முந்திரி,திராட்ஷை சேர்த்து இறக்கவும்.

இதை சூடாகவும் சாப்பிடலாம். அல்லது fridgeல் வைத்தும் சாப்பிடலாம்.

கோதுமை மற்றும் வெல்லம் சேர்ப்பதால் இதை டயட்டில் இருப்பவர்களும் சாப்பிடலாம்.

குழந்தைகளும் விரும்பி சாப்பிடுவார்கள்.

முருங்கைக்காய் மசாலா

2009-07-15T09:16:00.007-04:00

தேவையானவை

முருங்கைக்காய் - 4 (சிறிய துண்டுகளாக நறுக்கவும்)

வெங்காயம் - 1/2 ( நீளவாக்கில் நறுக்கியது)

தக்காளி - 1/2 (நறுக்கியது)

கறிவேப்பிலை - சிறிது

தேங்காய் - 1 டேபிள்ஸ்பூன்

கடுகு

உப்பு

எண்ணெய்

அரைக்க

சின்ன வெங்காயம் - 5

பூண்டு - 4 பல்

இஞ்சி - 10 சிறிய துண்டுகள்

வரமிளகாய் - 2

கறிவேப்பிலை

மல்லி - 11/2 டேபிள் ஸ்பூன்

சீரகம் - 1 டீஸ்பூன்

சோம்பு - 1 டீஸ்பூன்

பட்டை - 2 துண்டுகள்

கசகசா - 1 டேபிள்ஸ்பூன்

செய்முறை

கடாயில் எண்ணெய் விட்டு கடுகு தாளித்து, வெங்காயம், தக்காளி, கறிவேப்பிலை சேர்த்து நன்கு வதக்கவும்.
பிறகு முருங்கைகாயை சேர்த்து வதக்கவும்.
அதில் அரைத்த விழுதை சேர்த்து நன்கு கலந்து, 1/2 கப் தண்ணீர் சேர்த்து வேக விடவும்.
முருங்கைக்காய் நன்கு வெந்து தண்ணீர் வற்றியதும், தேங்காய் சேர்த்து கலந்து இறக்கவும்.

சாதத்துடன் சாப்பிடலாம்.

சுரைக்காய் கடைசல்

2009-07-06T08:57:00.009-04:00

தேவையானவை

சுரைக்காய் - 1/2 (பொடியாக நறுக்கியது)

வெங்காயம் - 1/2 (பொடியாக நறுக்கியது)

தக்காளி - 1/2 (பொடியாக நறுக்கியது)

பச்சை மிளகாய் - 1 (பொடியாக நறுக்கியது)

கறிவேப்பிலை - சிறிது

மிளகாய்த்தூள் - 1 டீஸ்பூன்

மஞ்சள்தூள் - 1 டீஸ்பூன்

புளி - சிறிது

உப்பு

எண்ணெய்

பெருங்காயத்தூள் - சிறிது

செய்முறை

குக்கரில் சிறிது எண்ணெய் விட்டு வெங்காயம், பச்சைமிளகாய், கறிவேப்பிலை,பெருங்காயத்தூள் சேர்த்து வதக்கி அத்துடன் சுரைக்காய், தக்காளி சேர்த்து சிறிது வதக்கவும்
அதில் மிளகாய்த்தூள், மஞ்சள்தூள், உப்பு, புளி கலந்து சிறிது தண்ணீர் சேர்த்து குக்கரை மூடி போட்டு 2 விசில் வரும்வரை விட்டு எடுக்கவும்.
ஆறியதும் பருப்பு மத்து வைத்து நன்கு கடைந்து விட்டு மல்லித்தளை தூவி வைக்கவும்.

இது உப்புமா மற்றும் வெண்பொங்கலுக்கு நல்ல combination. இட்லி, தோசைக்கும் நல்லா இருக்கும்.

எண்ணெய் கத்தரிக்காய் குழம்பு

2009-06-25T17:59:00.012-04:00

தேவையானவை

கத்தரிக்காய் - 15

வெங்காயம் - 1/2 (பொடியாக நறுக்கியது)

கறிவேப்பிலை

பெருங்காயத்தூள் - 1 டீஸ்பூன்

புளிக்கரைசல் - 1 கப்

உப்பு

வதக்கி அரைக்க

சின்ன வெங்காயம் - 20 (நறுக்கியது)

வரமிளகாய் - 5
சீரகம் - 1 டீஸ்பூன்

வெந்தயம் - 1/2 டீஸ்பூன்

எள் - 1 டீஸ்பூன்

மிளகு - 1 டீஸ்பூன்

மல்லித்தூள் - 3 டேபிள்ஸ்பூன்

மஞ்சள்தூள் - 1 டீஸ்பூன்

தேங்காய் துறுவல் - 2 டேபிள்ஸ்பூன்

கறிவேப்பிலை - சிறிது

செய்முறை

கத்தரிக்காயை காம்பை நறுக்காமல், அதன் அடி பாகத்தை நான்காக கீறி வைக்கவும்.
கடாயில் எண்ணெய் விட்டு வரமிளகாயை வதக்கி எடுக்கவும். பிறகு அதே எண்ணெயில் சின்ன வெங்காயம், கறிவேப்பிலை, சீரகம், மிளகு, வெந்தயம் சேர்த்து சிறு தீயில் நன்கு வதக்கவும்.
வெங்காயம் வதங்கியதும் அத்துடன் மல்லித்தூள், மஞ்சள்தூள் சேர்த்து வதக்கவும்.பின்பு அதில் தேங்காய் துறுவல் சேர்த்து வதக்கி இறக்கவும்.
இது ஆறியதும் நன்கு விழுதாக அரைத்து எடுக்க வேண்டும்.
கடாயில் சிறிது எண்ணெய் விட்டு கத்தரிக்காய்களை உடையாமல் வதக்கி எடுக்கவும்.
அதே கடாயில் வெங்காயம், கறிவேப்பிலை சேர்த்து வதக்கி, சிறிது பெருங்காயம் சேர்க்கவும்.
இதில் கத்தரிக்காய்களை சேர்த்து புளித்தண்ணீர், உப்பு சேர்த்து நன்கு கொதிக்கவிடவும்.
அத்துடன் அரைத்த விழுதை சேர்த்து சிறு தீயில் நன்கு கொதிக்க விட்டு இறக்கவும்.

எங்கள் கொங்கு பகுதியில் உப்புப்பருப்பு, சாதம், எண்ணெய் கத்தரிக்காய் குழம்பு combination மிகவும் பிரபலம்.

மாங்காய் ஊறுகாய் (Mango Pickle)

2009-06-22T09:16:00.009-04:00

கடையில் வாங்கும் ஊறுகாயின் வினிகர் வாசம் பிடிக்கத்தால், அம்மாவிடம் கேட்டு செய்தது இது.

தேவையானவை

மாங்காய் - 2 பெரியது
உப்பு - 2 கப்
மிளகாய்த்தூள் - 1 1/2 கப்
பெருங்காயத்தூள் - 1 டீஸ்பூன்
வெந்தயத்தூள் - 1 டீஸ்பூன் (வெந்தயத்தை எண்ணெய் விடாமல் சிவக்க வறுத்து பொடிக்க வேண்டும்)
கடுகுத்தூள் - 1 டீஸ்பூன்
கடுகு - சிறிது
நல்லெண்ணெய் - 2 கப்
கறிவேப்பிலை

செய்முறை

மாங்காயை கழுவி உலர்த்தி, சிறு துண்டுகளாக நறுக்கவும்.
இதில் உப்பு கலந்து மூடி வைக்கவும். ( கண்ணாடி பாத்திரத்தில் வைத்தால் சீக்கிரம் கெடாது)
ஒவ்வொரு நாளும் கை படாமல் கலக்கி விடவும்.
5 அல்லது 6 நாள் சென்ற பிறகு மிளகாய்த்தூளை ஊறிய மாங்காயுடன் கலக்கவும்.
கடாயில் நல்லெண்ணெய் விட்டு நன்கு காய்ந்ததும், கடுகு, பெருங்காயத்தூள், வெந்தயத்தூள், கடுகுத்தூள், கறிவேப்பிலை சேர்த்து, அத்துடன் மாங்காயும் சேர்த்து வதக்கி எடுத்து வைக்கவும்.

2 வாரங்களுக்குப் பிறகு உபயோகிக்கலாம்.
6 மாதங்கள் வரை கெடாமல் இருக்கும்

காளான் குழம்பு (Mushroom kuzhambu)

2009-06-14T20:52:00.008-04:00

தேவையானவை

காளான் - 1/4 கிலோ

வெங்காயம் - 1/2 (பொடியாக நறுக்கியது)

கறிவேப்பிலை - சிறிது

கடுகு

உப்பு

வதக்கி அரைக்க

சின்ன வெங்காயம் - 20

வரமிளகாய் - 4

மிளகு - 1 டீஸ்பூன்

சீரகம் - 1 டேபிள் ஸ்பூன்

சோம்பு - 1 டேபிள் ஸ்பூன்

பட்டை - 4 சிறிய துண்டுகள்

கசகசா - 1 டேபிள் ஸ்பூன்

மல்லித்தூள் - 2 டேபிள் ஸ்பூன்

மஞ்சள் தூள் - 1 டீஸ்பூன்

தேங்காய் துறுவல் - 3 டேபிள் ஸ்பூன்

செய்முறை

காளானை கழுவி நறுக்கி வைக்கவும்.

கடாயில் எண்ணெய் விட்டு வரமிளகாயை வதக்கி எடுக்கவும். பிறகு அதே எண்ணெயில் சின்ன வெங்காயம், கறிவேப்பிலை, சீரகம், மிளகு, சோம்பு, கசகசா, பட்டை சேர்த்து சிறு தீயில் நன்கு வதக்கவும்.

வெங்காயம் வதங்கியதும் அத்துடன் மல்லித்தூள், மஞ்சள்தூள் சேர்த்து வதக்கவும்.

பின்பு அதில் தேங்காய் துறுவல் சேர்த்து வதக்கி இறக்கவும்.

இது ஆறியதும் நன்கு விழுதாக அரைத்து எடுக்க வேண்டும்.

அரைத்த விழுதுடன் காளான் மற்றும் உப்பு சேர்த்து குக்கரில் வைத்து 2 விசில் வரும் வரை விடவும்.

பிறகு கடாயில் சிறிது எண்ணெய் விட்டு கடுகு, வெங்காயம், கறிவேப்பிலை தாளித்து விட்டு அத்துடன் குக்கரில் உள்ள குழம்பு கலவையை சேர்த்து ஒரு கொதி விட்டு இறக்கவும்.

இது கொங்கு நாட்டு கோழி குழம்பு செய்முறை. நான் கோழிக்கு பதிலாக காளான் சேர்த்துள்ளேன்.

காய்கறி கொத்து பரோட்டா

2009-03-23T08:18:00.008-04:00

தேவையானவை

frozen பரோட்டா - 6
காய்கறி - 11/2 கப் (கேரட், பீன்ஸ்,பட்டாணி)
சோயா உருண்டைகள் - 1 கப்
வெங்காயம் - 1 (பொடியாக நறுக்கியது)
தக்காளி - 1 (பொடியாக நறுக்கியது)
முட்டை - 2 (optional)
சோயா உருண்டைகள் - 1 கப்
பச்சை மிளகாய் - 2 (பொடியாக நறுக்கியது)
மிளகாய்த்தூள் - 2 டீஸ்பூன்
மல்லித்தூள் - 1 டீஸ்பூன்
கரம் மசாலா - 1 டீஸ்பூன்
பிரியாணி இலை
சோம்பு - 1 டீஸ்பூன்
ஏலக்காய் -1
கடுகு
பட்டை - 3 சிறிய துண்டுகள்
கிராம்பு - 2
உப்பு
எண்ணெய்

செய்முறை

பரோட்டாவை சூடு பண்ணி சிறு துண்டுகளாக்கி வைக்கவும்.
கடாயில் எண்ணெய் சூடு பண்ணி கடுகு, பிரியாணி இலை, சோம்பு, பட்டை, ஏலக்காய், கிராம்பு தாளித்து, வெங்காயம் சேர்த்து வதக்கவும்.
பிறகு தக்காளி சேர்த்து சிறிது வதக்கி இஞ்சி பூண்டு விழுது சேர்த்து பச்சை வாசம் போக வதக்கவும்.
அத்துடன் காய்கள் மற்றும் சோயா உருண்டைகள் சேர்த்து சிறு தீயில் வேக விடவும்.
அதில் மிளகாய்த்தூள், மல்லித்தூள், கரம் மசாலா, உப்பு சேர்த்து கலக்கவும்.
இதில் பராட்டாவை சேர்த்து நன்கு கலக்கவும். இதை செய்யும் போதே முட்டையை உடைத்து ஊற்றி நன்கு அடிக்கவும்.
பராட்டா கலவையில் முட்டையை ஊற்றி நன்கு கலந்து, 3 நிமிடம் வேக விடவும்.

தயிர் பச்சடியுடன் சாப்பிடலாம்.

வெந்தயக்கீரை சாதம்

2009-03-17T18:43:00.010-04:00

தேவையானவை

வெந்தயக்கீரை - 1 கட்டு (பொடியாக நறுக்கியது)

சாதம் - 11/2 கப்

வெங்காயம் - 1 (நீளவாக்கில் நறுக்கியது)

பச்சை மிளகாய் - 2 (நீளவாக்கில் கீறியது)

தக்காளி - 1 சிறியது

இஞ்சி பூண்டு விழுது - 1 டேபிள்ஸ்பூன்

பட்டை - 1 துண்டு

கிராம்பு - 2

கடுகு

மிளகாய்த்தூள் - 1 டீஸ்பூன்

மஞ்சள்தூள் - 1 டீஸ்பூன்

எண்ணெய்

உப்பு

செய்முறை

சாதத்தை உதிரியாக வேகவைத்து எடுத்து வைக்கவும்.

கடாயில் எண்ணெய் விட்டு கடுகு, பட்டை, கிராம்பு போட்டு, இஞ்சி பூண்டு விழுது சேர்த்து பச்சை வாசம் போக வதக்கவும்.

அதில் வெந்தயக்கீரை சேர்த்து நன்கு வதக்கவும்.

பின் வெங்காயம் சேர்த்து நன்கு வதங்கியதும், தக்காளி, உப்பு, மஞ்சள் தூள், மிளகாய்த்தூள் சேர்த்து வதக்கவும்.

தக்காளி வெந்ததும், சாதம் சேர்த்து நன்கு கலக்கவும்.

அப்பளம், வடகம் அல்லது, சிப்ஸ் உடன் சாப்பிடலாம்.

தக்காளி குழம்பு

2009-03-14T12:55:00.006-04:00

தேவையானவை

வெங்காயம்- 1 (நறுக்கியது)

தக்காளி - 2 (நறுக்கியது)

கறிவேப்பிலை

வர மிளகாய் - 3

சோம்பு - 1 டீஸ்பூன்

கசகசா - 1 டீஸ்பூன்

பட்டை - 2 சிறிய துண்டுகள்

சீரகம் - 1 டீஸ்பூன்

மிளகு - 4 அல்லது 5

தேங்காய் - 2 டேபிள்ஸ்பூன்

மல்லித்தூள் - 2 டேபிள்ஸ்பூன்

எண்ணெய்

உப்பு

செய்முறை

கடாயில் எண்ணெய் விட்டு வரமிளகாயை வறுத்து எடுக்கவும்.
பிறகு அதே எண்ணெயில் 3/4 வெங்காயம், பட்டை, சோம்பு, கசகசா, சீரகம், மிளகு, பாதி கறிவேப்பிலை சேர்த்து சிறு தீயில் வறுக்கவும்.
வெங்காயம் நன்கு வதங்கியதும் அதில் மல்லித்தூள், தேங்காய் சேர்த்து வறுத்து தனியே எடுக்கவும்.
அதே கடாயில் சிறிது எண்ணெய் விட்டு 11/2 தக்காளியை வதக்கி எடுக்கவும்.
அனைத்தையும் ஆற விட்டு விழுதாக அரைத்து வைக்கவும்.
கடாயில் சிறிது எண்ணெய் விட்டு கடுகு தாளித்து, வெங்காயம், பூண்டு, தக்காளி, கறிவேப்பிலை சேர்த்து வதக்கி, அரைத்தவற்றை சேர்த்து நன்கு கொதிக்க விடவும்.

இட்லி, தோசை அல்லது சாதத்துடனும் சாப்பிடலாம்.

பருப்பு சாதம்

2009-03-10T20:38:00.008-04:00

கொங்கு நாட்டில் பிரபலமான உணவு இது. அரிசி பருப்பு சாதம்னும் சொல்லலாம்.

தேவையானவை

அரிசி - 2 கப்
துவரம் பருப்பு - 1/2 கப்

வெங்காயம் - 1 (நறுக்கியது)

தக்காளி - 1/2 (நறுக்கியது)
தேங்காய் துறுவல் - 1 டேபிள்ஸ்பூன் (optional)
சீரகம் - 1 டீஸ்பூன்
பூண்டு - 4 பல் (பொடியாக நறுக்கியது)
மிளகாய்த்தூள் - 1 டீஸ்பூன்
கடுகு
எண்ணெய்
உப்பு

செய்முறை

குக்கரில் எண்ணெய் விட்டு கடுகு , சீரகம் தாளித்து, பூண்டு, வெங்காயம், தக்காளி சேர்த்து வதக்கவும்.
அதில் மிளகாய்த்தூள், உப்பு, தேங்காய் சேர்த்து வதக்கவும்.

அதில் கழுவிய அரிசி, பருப்பு சேர்த்து 5 கப் தண்ணீர் சேர்த்து கலந்து குக்கரின் மூடியை போட்டு 1 விசில் வந்ததும், மிகச்சிறுதீயில் 5 நிமிடம் வைத்து இறக்கவும்.
கடைசியாக மல்லி இலை தூவி கலக்கவும்..

நெய்யுடன் கலந்து சாப்பிடலாம்.

இதற்கு கத்தரிக்காய் புளிக்குழம்பும் நன்றாக இருக்கும்.

குடமிளகாய் சாதம் (Bell Pepper Rice) (Capsicum Rice)

2009-03-07T10:55:00.008-05:00

தேவையானவை

சாதம் - 4 கப்
குடமிளகாய் - 2 (நீளவாக்கில் நறுக்கியது)
வெங்காயம் - 11/2 (நீளவாக்கில் நறுக்கியது)
கறிவேப்பிலை
உப்பு

தாளிக்க

கடுகு
கடலைப்பருப்பு
உளுந்தம்பருப்பு
எண்ணெய்

வறுத்து பொடிக்க

வர மிளகாய் - 5
கடலை பருப்பு - 1 டேபிள்ஸ்பூன்
உளுந்தம்பருப்பு - 1 டீஸ்பூன்
மல்லி விதை - 1 டேபிள்ஸ்பூன்
எள் - 1/4 டீஸ்பூன்
நிலக்கடலை - 1 டேபிள்ஸ்பூன்
சீரகம் - 1 டீஸ்பூன்
பட்டை - 1 சிறிய துண்டு
கிராம்பு - 2
மிளகு - 11/2 டீஸ்பூன்
தேங்காய் துறுவல் - 1/2 டேபிள்ஸ்பூன்

வெறும் வாணலியில் வறுத்து பொடிக்கவும்..

செய்முறை

சாதத்தை உதிரியாக வேகவைத்து வைக்கவும்.

கடாயில் எண்ணெய் விட்டு கடுகு, கடலைப்பருப்பு, உளுந்தம்பருப்பு, தாளித்து , வெங்காயம், குடமிளகாய், கறிவேப்பிலை சேர்த்து வதக்கவும்.

பிறகு அத்துடன் சாதம், உப்பு, மற்றும் பொடித்ததை சேர்த்து நன்கு கலக்கவும்.

அப்பளத்துடன் சாப்பிட நல்லா இருக்கும்.

முட்டை ஃப்ரை (Egg Fry)

2009-03-07T10:04:00.009-05:00

தேவையானவை

முட்டை - 4

சக்திமசாலா fish fry masala - 1 டேபிள்ஸ்பூன்

சோள மாவு(corn flour) - 1 டீஸ்பூன்

தயிர் - 1 டீஸ்பூன்

எலுமிச்சை சாறு - 1 டீஸ்பூன்

உப்பு

எண்ணெய்

bread crumbs

செய்முறை

முட்டையை வேகவைத்து உறித்து, இரண்டாக வெட்டி வைக்கவும்.
அதன் வெள்ளைப்பகுதியில் லேசாக கீறல் போடவும்.
சக்திமசாலா, சோள மாவு, தயிர், எலுமிச்சை சாறு, உப்பு சேர்த்து கலந்து, முட்டையில் தடவி 15 நிமிடம் வைக்கவும்.
ஒரு non-stick தவாவில் சிறிது எண்ணெய் விட்டு காய விடவும்.
முட்டையை bread crumbs ல் பிரட்டி தவாவில் போட்டு 2 நிமிடம் விடவும்.
பிறகு அதை திருப்பி போட்டு 2 நிமிடம் விட்டு எடுக்கவும்.

இதை party starter ஆகவோ, தயிர் சாதத்துடனோ அல்லது அப்படியேவோ சப்பிடலாம்.

முட்டை கறி (Egg Curry)

2009-03-04T09:13:00.009-05:00

எப்பவும் சக்தி மசாலா உபயோகிச்சு முட்டை கறி செய்யறது அலுத்துப் போனதால இது புது முயற்சி.

தேவையானவை

முட்டை - 6

வெங்காயம் - 1 (பொடியாக்க நறுக்கியது)

பச்சை மிளகாய் -2 (பொடியாக நறுக்கியது)

கறிவேப்பிலை

மிளகாய்த்தூள் - 1 டீஸ்பூன்

மல்லித்தூள் - 2 டீஸ்பூன்

சீரகத்தூள் - 1/2 டீஸ்பூன்

எண்ணெய்

உப்பு

அரைக்க

தேங்காய் துறுவல் - 2 டேபிள்ஸ்பூன்

கசகசா - 1 டேபிள்ஸ்பூன்

செய்முறை

முட்டையை வேகவைத்து ஓடு உறித்து வைக்கவும்.

கடாயில் எண்ணெய் விட்டு கடுகு தாளித்து, வெங்காயம், மிளகாய், கறிவேப்பிலை சேர்த்து வதக்கவும்.

நன்கு வதங்கியதும், மிளகாய்த்தூள், மல்லித்தூள், சீரகத்தூள், உப்பு சேர்த்து வதக்கவும்.

பின்பு அரைத்த விழுது மற்றும் தண்ணீர் சேர்த்து கொதிக்க விடவும்.

முட்டையை பாதியாக வெட்டி, அதில் 3 முட்டையின் மஞ்சள் கருவை எடுத்து பொடித்து, கொதித்த கலவையில் சேர்த்து கலக்கவும்.

மற்ற முட்டைகளையும் சேர்த்து 10 நிமிடம் குறைந்த தீயில் கொதிக்க விட்டு, மல்லித்தழை தூவி இறக்கவும்.

சாதம், சப்பாத்தி இரண்டுக்கும் நல்ல combination.

Easy காய்கறி சூப்

2009-03-01T15:02:00.009-05:00

தேவையானவை

வெங்காயம் - 1/2 (நறுக்கியது)

தக்காளி - 1 (நறுக்கியது)

பூண்டு - 3 பல்

காய் விருப்பம் போல - 1/2 கப்

துவரம்பருப்பு - 2 டேபிள்ஸ்பூன்

அரிசி அல்லது ஓட்ஸ் - 2 டேபிள்ஸ்பூன்

பொடிக்க

மல்லி - 1 டேபிள்ஸ்பூன்

சீரகம் - 1 டீஸ்பூன்

மிளகு - 1 டீஸ்பூன்

செய்முறை

குக்கரில் சிறிது ஆலிவ் ஆயில் ஊற்றி வெங்காயம், தக்காளி சேர்த்து வதக்கி, அத்துடன் காய், அரிசி, பருப்பு, அரைத்த பொடி சேர்த்து கலந்து தண்ணீர் 3 கப் மற்றும் உப்பு சேர்த்து மூடி வைத்து வேக விடவும்

3 விசில் வந்ததும் இறக்கி பறிமாறவும்.

காய் விருப்பமானவற்றை சேர்க்கலாம். நான் இதில் கேரட், முருங்கைகாய், சோளமுத்துக்கள், பீன்ஸ், உருளைக்கிழங்கு, லீமா பீன்ஸ், ஸுக்கினி மற்றும் கீரை சேர்த்துள்ளேன்.

காரம் வேண்டுமானால் 1 பச்சை மிளகாய் சேர்க்கலாம

காளான்(mushroom) குருமா

2009-02-24T19:37:00.010-05:00

தேவையானவை

காளான் -1/2 kg or 1 lb(நறுக்கியது)

சீரகம் - 1 டீஸ்பூன்

வெங்காயம் - 1/2 ( பொடியாக நறுக்கியது)

பச்சை மிளகாய் - 1 ( பொடியாக நறுக்கியது)

தக்காளி பேஸ்ட் - 1 டேபிள் ஸ்பூன்

கரம் மசாலா - 1/2 டீஸ்பூன்

மல்லி இலை

வதக்கி அரைக்க

வெங்காயம் - 1/2
தக்காளி - 1/2

பூண்டு- 2 பல்

இஞ்சி - 1 துண்டு

மல்லித்தூள் - 1 டேபிள் ஸ்பூன்
மிளகாய்த்தூள் - 1 டீஸ்பூன்

முந்திரி - 5

பாதாம் - 5

செய்மூறை

எண்ணெய் விட்டு வெங்காயம் 1/2 , பூண்டு, இஞ்சியை நன்கு வதக்கி, பிறகு தக்காளி சேர்த்து வதக்கவும்.
அத்துடன் மல்லித்தூள், மிளகாய்த்தூள் சிறிது நீர் சேர்த்து கொதிக்க விடவும்.
இதை ஆற விட்டு முந்திரி, பாதாம் சேர்த்து அரைக்கவும்.
கடாயில் எண்ணெய் விட்டு சீரகம் தாளித்து மீதமுள்ள வெங்காயம் , மிளகாய் சேர்த்து வதக்கவும்.
பின்பு அரைத்த விழுதுடன் தண்ணீர் சேர்த்து கொதிக்க விடவும்.
நன்கு கொதித்தவுடன் காளான் மற்றும் கரம் மசாலா சேர்த்து மறுபடியும் 3 நிமிடம் கொதிக்கவிடவும்.
மல்லி இலை தூவி இறக்கவும்.

சப்பாத்தி, பராட்டா, சாதம் அனைத்துக்கும் நல்ல combination.

கொண்டைக்கடலை குருமா

2008-09-22T08:28:00.006-04:00

தேவையானவை

கொண்டைக்கடலை - 1 கப்
உருளைக்கிழங்கு - 1 (optional) (நறுக்கியது)
வெங்காயம் - 1 (நறுக்கியது)
தக்காளி - 1/2 (நறுக்கியது)
பச்சை மிளகாய் - 1
கறிவேப்பிலை - சிறிது
மிளகாய்த்தூள் - தேவையான அளவு
உப்பு
எண்ணெய்

வறுத்து பொடிக்க:

கொத்தமல்லி - 1 டீஸ்பூன்
சீரகம் - 1/2 டீஸ்பூன்
பட்டை - 4 அல்லது 5 சிறிய துண்டுகள்
கிராம்பு - 2
பாதாம் - 4
முந்திரி - 10

எண்ணெய் விடாமல் வறுத்து பொடிக்கவும்.

செய்முறை

கொண்டைக்கடலையை 8 மணி நேரம் ஊற வைத்து, குக்கரில் வைத்து 3 விசில் விட்டு எடுக்கவும்.

கடாயில் எண்ணெய் விட்டு வெங்காயம், பச்சை மிளகாய், கறிவேப்பிலை சேர்த்து, நன்கு வதங்கியதும், உருளைக்கிழங்கு, தக்காளி சேர்த்து வதக்கவும்.

சிறிது தண்ணீர் விட்டு உருளைகிழங்கை வேக விடவும்.

பிறகு கொண்டைக்கடலை சேர்த்து, அரைத்த பொடி , மிளகாய்த்தூள், மற்றும் உப்பு சேர்த்து நன்கு கொதிக்க விடவும்.

மல்லித்தளை சேர்த்து எடுத்து வைக்கவும்.

பூரி, சப்பாத்தி அல்லது தோசையுடன் சப்பிடலாம்.